Музычныя малітвы за лёс Беларусі і нашага народа

таму

Выдрукаваць Пракаментаваць (0) Падзяліцца

Працягам серыі музычных малітваў за лёс Беларусі і нашага народа 17 кастрычніка стане ўнікальны канцэрт знакамітага калектыву — адноўленага беларускага мужчынскага хору “УНІЯ”.

Праграма пад назвай “Новы час” будзе прысвечана ўсім, хто сваёй дзейнасцю дбае пра чалавечую духоўнасць.

Прагучаць духоўныя творы VI-XX стагоддзяў:

1. «Ойча наш». Візантыйскі распеў 5-ы глас 2. «Багародзіца». Аўтар невядомы, тэкст перавёў Ул. Мархель 3. «Псалом пакаянны» (50-ы). Муз. К. Насаеў 4. Псалом 116 «Алілуя, Слаўце Бога». Муз. Вацлаў з Шамотул 5. «Разбойніка». Муз. М. Бутома 6. «Дар міру». Муз. М. Шчаглоў-Куліковіч 7. «Дай, добры Божа». Сл. Гірмановіча 8. «Sanctus Benedictus». Муз. А. Літвіноўскі 9. «Ave Maria». Муз. А. Дзюран, апр. К. Насаеў 10. «Добра як у пана». Муз. Ст. Манюшка, сл. Я. Чачот

Салісты: Арына Аляксеева (сапрана) Юры Габрусь (арган). Мастацкі кіраўнік і дырыжор — Павал Гонца.

Першы мужчынскі ў Беларусі хор “УНІЯ” быў створаны у 1990 г. у Менску выбітным хормайстрам, кампазітарам і педагогам Кiрылам Насаевым (15 мая 1960 — 17 ліпеня 2018). Праваслаўныя, каталікі, уніяты, пратэстанты сабраліся разам, каб спяваць беларускія хрысціянскія песні.

У рэпертуары: манастырскiя напевы XV-XVІІ стст., рэлiгiйныя i свецкiя творы розных эпох, у тым лiку гiмны, апрацоўкi народных песень, духоўная музыка кампазiтараў XVІ-XХ стст. i сучасных аўтараў. Даволі знакамітыя выкананні хору «Ваяцкі марш» і «Пагоня».

У 1993 г. заняў першае месца на фестывалі духоўнай музыкі «Магутны Божа», у 1995 стаў лаўрэатам конкурса імя Шуберта ў Вене, даваў канцэрты ў Францыі, Бельгіі, Турцыі, Польшчы, Літве. З 1995 пры Магілёўскай філармоніі. У 1996 годзе хор запісаў праграму «Музыка Літвы і Кароны», якая была выдадзена на касетах і стала рарытэтам. У 1998 г. была выдадзена яшчэ адна ўнікальная праграма — «Беларускія маршы і песні. Лірыка змагання», прысвечаная БНР. З 2001 хор зноў працуе ў Мінску. У тым жа 2001 г. Кірыла Насаеў прыняў рашэнне аб прыпыненні дзейнасці хору, бо на пачатку 2000-х фінансаванне скончылася. Апошні канцэрт «Унія» дала ў лістападзе 2002 г. у Мінску. У 2011 годзе хор аднавіўся дзеля аднаго канцэрта, аднак больш не выступаў і сёння адбываецца адраджэнне ўнікальнага калектыву.

У наш час падаецца асабліва важным праліць духоўны свет, аб’яднаць жыхароў нашай роднай Беларусі малітвай і высокім мастацтвам, а таксама дапамагчы тым, хто мае патрэбу ў дапамозе.

Прыбыткі ад першых трох канцэртаў серыі #МалітвыБеларусі былі накіраваныя на падтрымку Чырвонага касцёла і беларускіх дзеячаў культуры, якія пацярпелі ў апошні час… Сродкі ад правядзення наступных імпрэз таксама будуць размеркаваныя гэтым жа чынам.

Мінімальны кошт квітка — 10 рублёў, але можна зрабіць данацыю і больш. Кошт квітка не залежыць ад месца, (свабодная рассадка), а толькі ад жадання і магчымасцяў падтрымаць Чырвоны касцёл і дзеячаў культуры. Дзіцячы квіток — 5 рублёў.

Набыць квіткі магчыма анлайн на сайтах https://www.kvitki.by/ і https://smsbilet.by/, а таксама непасрэдна ў касцёле перад пачаткам канцэрта.

Колькасць месцаў абмежаваная, таму паклапаціцеся, калі ласка, аб квітках загадзя.

Таксама неабходна прытрымлівацца правілаў эпідэміялагічнай бяспекі і пры наяўнасці любых сімптомаў прастудных захворванняў устрымацца ад наведвання імпрэзы.