Нарвежская прэмія «За свабоду слова» — Дзмітрыю Строцаву і Ганне Комар
Міжнародны камітэт Нарвежскай асацыяцыі пісьменнікаў ганараваў «Прэміяй за свабоду слова» беларускіх паэтаў Дзмітрыя Строцава і Ганну Комар.
Прэмія «За свабоду слова»-2020 уручаецца беларускім аўтарам Ганне Комар і Дзмітрыю Строцаву. Пра гэта сказана ў заяве Міжнароднага камітэта Нарвежскай асацыяцыі пісьменнікаў.
Пасля „перавыбрання” Аляксандра Лукашэнкі ў жніўні мінулага года беларусы ў вялікай колькасці выйшлі на вуліцы, пратэстуючы супраць таго, што яны палічылі несапраўдным вынікам выбараў. Аўтары ўдзельнічалі ў мірных маршах пратэсту і адыгралі важную ролю ў падтрымцы пратэсту. Улады ў адказ пераследавалі, выкрадалі і арыштоўвалі пісьменнікаў, журналістаў і актывістаў, і таму на свабоду меркаванняў аказваецца моцны ціск.
У гэтым годзе IU хоча падзяліць прыз паміж двума аўтарамі, якія прадстаўляюць пакаленне актывістаў, якія прыклалі вялікія намаганні і пастаянна знаходзяцца ў цэнтры змагання за свабоду слова ў Беларусі.
«Дзякуй, што вы нас чуеце і салідарныя з намі, зрабілі ўсё магчымае, каб дапамагчы нам атрымаць свабоду. Для мяне вялікі гонар атрымаць гэтую ўзнагароду, калі гэта азначае, што я магу зрабіць нешта для Беларусі і яе народа. Мой шлях як аўтара і праваабаронцы толькі пачаўся, і я ведаю людзей, якія зрабілі значна больш для свабоды слова ў Беларусі, але гэта сведчыць пра давер, і я хачу працягваць быць голасам свайго народа. Спадзяюся, я не падвяду, — кажа Ганна Комар. — Мастакі, паэты, тэатральныя работнікі, музыкі аднымі з першых адгукнуліся на заклік да перамен, але яны ўмеюць гаварыць самі за сябе. Я хацела б выказаць голас тых, хто са дня ў дзень самааддана, рызыкуючы здароўем, жыццём, дабрабытам, сем’ямі, падтрымлівае полымя нашай мірнай рэвалюцыі — рэвалюцыі годнасці. Яны заслугоўваюць таго, каб пра іх ведалі ў свеце».
«Беларускі пратэст не быў бы такім крэатыўным, калі б не ўдзел творчых людзей. Мастакі, артысты, музыкі, паэты ўключыліся ў пратэст, далі новы імпульс пратэсту і падзялілі ўсе рызыкі народа, які пратэстуе. Сёння, пасля 6 месяцаў пратэстаў, праз турмы прайшлі больш за 30 000 чалавек. Каля 300 чалавек прызнаныя палітычнымі вязнямі, — кажа Дзмітрый Строцаў. — Услед за Ганнай я з удзячнасцю прымаю ўвагу і прэмію Нарвежскага саюза пісьменнікаў. Я захапляюся Ганнай як чалавекам, вельмі цаню яе як паэта. Шчаслівы падзяліць з ёй гэтую высокую ўзнагароду. Няхай жыве Нарвегія! Жыве Беларусь!»
Паводле lit-bel.org
