„Наша думка”: Колькі ўрадаў у беларускага народу
У 1920 годзе віленская беларуская газета „Наша думка” (№1) змясціла зацемку „Колькі цяпер урадау у беларускага народу”. У ёй пералічваліся ўсе ўрады і вайсковыя адміністрацыі, што панавалі ці прэтэндавалі на ўладу над Беларуссю ці асобнымі часткамі яе этнічнай тэрыторыі.
Колькі цяпер урадау у беларускага народу
Дванаццаціміліённы беларускі народ цяпер маець гэтакія ўрады:
1) Беларускі ўрад на чале з Вацлавам Ластоўскім, абраны на сэсіі Рады Беларускай рэспублікі ў 1919 годзе. Урад гэты цяпер знаходзіцца ў Коўні і зрабіў саюз з Літвою проціў Польшчы.
2) Камуністычны беларускі ўрад на чале з Аляксандрам Чарвяком. Ён знаходзіцца ў Менску і кіруець Савецкай Беларусьсю (некалькі паветаў Меншчыны).
3) Беларускі Палітычны Камітэт на чале з Адамовічам. Ён цягне за Польшчу і пануець у той частцы Беларусі, якую занялі войскі Балаховіча.
4) У Віленшчыне беларускімі справамі кіруе ўрад Сярэдняй Літвы, у склад якога ўваходзіць і беларускі адраджэнец пан Вацлаў Іваноўскі.
5) У Літоўскай рэспубліцы беларусы маюць свайго міністра.
6) У палавіне Беларусі, далучанай да Маскоўшчыны (часткі Смаленскай, Магілёўскай, Віцебскай і іншых губэрніяў) пануе ўлада маскоўскіх камуністаў.
7) У Горадзеншчыне – ўлада польскага ўраду.
8) У трох беларускіх паветах Віцебшчыны, аддадзеных Масквою Лацьвіі, беларусы падчыняюцца лацьвійскаму ўраду па агульных законах гэтае рэспублікі.
9) Некаторыя паўдзённыя часткі Беларусі належаць да Савецкай Украіны.
10) У нейтральнай паласе, між расейскай і польскай арміяй, няма ніякага ўраду і справамі кіруюць розныя беларускія камітэты.
Савецка-літоўская і савецка-латвійская граніцы дадзены паводле мірных дагавораў 1920 г. (Фота: jivebelarus.net)
„Наша думка” — штотыднёвая грамадска-палітычная і літаратурная газета. Выходзіла на беларускай мове ў Вільні (24 лютага 1920 — 8 ліпеня 1921). Рэдактар-выдавец Максім Гарэцкі.
Аляксей Трубкін, Беларускае Радыё Рацыя
