Настаўніца з Мядзельшчыны выпусціла паэтычны зборнік
Настаўніца Свірскага вучэбна –педагагічнага комплексу школы-сад – Валянціна Пісарчык з вёскі Камарова Мядзельскага раёна выпусціла свой першы паэтычны зборнік “Храм на бяросце”.
Прыгожы і арыгінальна выдадзены зборнік адразу прыцягвае ўвагу. Яе аўтарка падчас вучобы ў Белдзяржуніверсітэце ў 1980-1985 гадах наведвала ўніверсітэцкае літаб’яднанне “Узлёт”, якім кіраваў прафесар Алег Лойка. Тады Валянціна Пісарчык друкавала свае вершы пад дзявочым прозвішчам Місюк. Вершы былі апублікаваныя ў зборніках “Вусны”, “Квадра”, у рэспубліканскіх газетах і часопісах.
Прайшло шмат гадоў, але Валянціна ніколі не развітвалася з беларускім паэтычным словам. Яе паэтычныя шчырыя і філасофскія вершы напоўнены роздумам аб чалавечым жыцці, аб лёсе роднага краю, яго гістарычнай спадчыны. Асобнае месца ў зборніку аўтаркі займае еднасць з самай блізкай мясцінай – ваколіцай блакітных азёр, што на Мядзельшчыне, глыбока раскрыта тэма мастацтва, кахання, маленькай радзімы:
Здарожыўся і песню заспяваў
Ля дрэў чужых, ля вёскі незнаёмай.
Так доўга чалавек ішоў дамоў,
Што нават хаты роднай не пазнаў…
У многіх творах паэткі сустракаюцца рэлігійныя матывы. У такіх вершах паэтка разважае пра ўзаемаадносіны паміж людзьмі, пра мастацтва, пра чалавечае цярпенне і людскую павагу.
[Not a valid template]
Барыс Баль, Беларускае Радыё Рацыя, Мядзельскі раён
