Паэтка Людміла Паўлікава адзначае юбілей
Не праміце сцяжыну ў казку!
Не замуруйце сваю пяшчоту!
Не пакідайце на потым ласку!
Не пакідайце любоў на потым!
Гэтыя цудоўныя радкі напісала беларуская паэтка Людміла Паўлікава, якая 11 лютага адзначае свой прыгожы юбілей. У паэзію яна прыйшла імгненна і адразу яе запрыкмецілі чытачы. Паэтычны дэбют у часопісе “Маладосць” у 1980 годзе быў паспяховым. За першую падборку вершаў паэтка атрымала прэмію года часопіса. А пра першы яе зборнік вершаў “Адведзіны рамонкавай паляны” (1985) у друку з’явілася шэраг станоўчых рэцэнзій і шмат добрых водгукаў сяброў па пяру.
З гэтага часу вершы, паэмы, празаічныя творы і пераклады Людмілы Пазлікавай друкуюцца ва ўсіх беларускіх газетах і часопісах, зборніках і альманахах. Для вершаў паэткі былі і застаюцца характэрны роздум над праблемамі сучаснасці, ёй уласцівы творчая актыўнасць, своеасаблівасць паэтычнага голасу, канкрэтнасць вобразнага мыслення, шчырасць і традыцыйная манера пісьма.
Родам Людміла Паўлікава з Асіповіцкага раёна. Скончыла далёка не гуманітарны факультэт, а факультэт прыкладной матэматыкі Белдзяржуніверсітэта. З друку выйшлі яе кнігі “Тваё святло”, “Можна і Нельга”, “Купанне ў росах”, “Плач па анёлу” і іншыя. За прынцыповасць і майстэрства ў асвятленні сучасных праблем Беларусі, пісьменніца ў 1996 годзе была ўзнагароджана прэміяй Алеся Адамовіча.
Беларускае Радыё Рацыя
