Памяці Ігара Жука
У Гародні, у Клубе праваслаўнай размовы пры Свята-Пакроўскім кафедральным саборы адбылася вечарына памяці Ігара Жука. Вечарына была адначасова і прэзентацыяй кнігі Ігара Жука “Прыхінуцца да крыніцы”, якая прысвечана класікам беларускай літаратуры Якубу Коласу ды Янку Купалу.
Пра Ігара Жука ўзгадвае старшыня філіі Саюза беларускіх пісьменнікаў у Гародні Валянцін Дубатоўка:
– Гэта з’ява ў літаратуры на Гарадзеншчыне, ва ўніверсітэцкім жыцці. Гэта чалавек, які шмат рабіў для літаратуры, для пішучай каманды, якая жыве тут, у Гародні. Справа ў тым, што гэта адзіны ў нас доктар навук, які займаўся літаратурнай дзейнасцю. Кніга, якая была прэзентавана, адносіцца да творчасці нашых класікаў – Янкі Купалы і Якуба Коласа.
Для журналіста, пісьменніка і праваабаронцы Віктара Сазонава Ігар Жук быў узорам беларускага інтэлігента:
– Для мяне Ігар Жук быў прыкладам, да якога трэба імкнуцца кожнаму чалавеку. Ён быў беларускім патрыётам. Нашы дарогі перасякаліся і на літаратурным, і на палітычным полі. Мы ўваходзілі з ім у адну партыю.
Сустрэча сабрала паўсотні гарадзенцаў рознага ўзросту, і кожны меў магчымаць не толькі набыць кнігу Ігара Жука, але і пачуць голас аўтара кнігі з архіўных запісаў.
[Not a valid template]
Беларускае Радыё Рацыя, Гародня
Глядзіце таксама
