„Пана Тадэвуша” публічна прачытаюць у Берасці
Прадстаўнікі дыпмісій у Берасці 28 лістапада публічна прачытаюць на розных мовах урыўкі з аповесці Адама Міцкевіча „Пан Тадэвуш”, паведаміла дырэктар Берасцейскай гарадской цэнтральнай бібліятэкі імя. А.С. Пушкіна Святлана Гарадзецкая.
Літаратурныя чытанні з’яўляюцца часткай мерапрыемства ў гонар 220-годдзя з дня нараджэння паэта, арганізаванага сумесна з Генеральным консульствам Польшчы ў Берасці. Урыўкі з аповесці „Пан Тадэвуш” на беларускай, украінскай, польскай, рускай і венгерскай мовах прачытаюць прадстаўнікі дыпламатычнага корпуса, акрэдытаваныя ў абласным цэнтры. Таксама чакаецца, што радкі з гэтага твора прагучаць на чэшскай і французскай мовах.
„Адам Міцкевіч унёс вялікі ўклад у паэтычнае слова свайго часу, яго творчасць стала свежым дыханнем для еўрапейскай літаратуры. Адно з самых вядомых твораў – „Пан Тадэвуш”. Гэтую аповесць называюць эпічнай карцінай пра жыццё шляхты, паколькі ў ёй праходзяць бытавая, ваенная, патрыятычная лініі”, – адзначыла Святлана Гарадзецкая.
Таксама гасцям з дапамогай вершаў, музыкі і пясочнай анімацыі раскажуць пра розныя перыяды жыцця і творчасці паэта: з моманту яго нараджэння ў сядзібе ў Завоссі да смерці ў Канстанцінопалі. У мерапрыемстве прымуць удзел школьнікі, прадстаўнікі грамадскіх арганізацый, інтэлігенцыі горада.
Адам Міцкевіч нарадзіўся 24 снежня 1798 года ў фальварку Завоссе Навагрудскага павета (цяпер Баранавіцкі раён). Яго постаць, непаўторная творчасць, жыццё асветніка сталі адным з самых вялікіх здабыткаў сусветнай культуры, невычэрпнай крыніцай духоўнасці беларускага і польскага народаў.
