Пленэр у Грушаўцы
Слонімскія мастакі наведалі мястэчка Грушаўка Ляхавіцкага раёна, вядомае з ХVI стагоддзя, як уласнасць Радзівілаў. Яшчэ ў 1551 годзе каралева Барбара Радзівіл перадала Грушаўку Мікалаю Залескаму. У канцы ХVІІ стагоддзя кароль Ян ІІІ Сабескі падараваў маёнтак кракаўскаму рыцару Марціну Рэйтану, які вызначыўся ў бітве з туркамі пад Венай. Вось такім шляхам Грушаўка перайшла ва ўладанне роду Рэйтана. Грушаўка – гэта месца нараджэння, жыцця і смерці амаль забытага на Радзіме і добра вядомага ў свеце Тадэвуша Рэйтана. Таго самага Рэйтана, які ў 1772 годзе на першым падзеле Рэчы Паспалітай, па словах пісьменніка Уладзіміра Арлова, лёг крыжам перад дзвярыма і закрычаў: “Забіце мяне, але не забівайце Бацькаўшчыны!”.
Слонімскія мастакі Казімір Кулеш, Андрэй Сідараў, Леанід Богдан і Васіль Грыневіч зладзілі вандроўку па Грушаўцы, а потым кожны паасобку малявалі то вузкую алею да капліцы, то рэшткі лядоўні, то капліцу, то драўляныя пабудовы – усё тое, што яшчэ засталося ад часу Рэйтанаў. Праз пэўны час слонімскія мастакі плануюць наладзіць выставу сваіх твораў, прысвечаных сядзібе знакамітых Рэйтанаў.
[Not a valid template]
Барыс Баль, Беларускае Радыё Рацыя, Ляхавіцкі раён, фота аўтара
