Прэм’ера балета „Карсар” пройдзе 7-8 кастрычніка ў Вялікім тэатры Беларусі
Прэм’ера балета „Карсар” Адольфа Адана адбудзецца 7-8 кастрычніка на сцэне Нацыянальнага акадэмічнага Вялікага тэатра оперы і балета Беларусі.
Ставіць ужо не першую версію гэтага спектакля ў беларускім Вялікім балетмайстар з Марыінскага тэатра ў Санкт-Пецярбургу Вячаслаў Хамякаў. Сёння ў рускай школе балета існуюць рэдакцыі балета „Карсар” Канстанціна Сяргеева – больш архаічная, але найбольш блізкая да арыгінала – версіі Марыуса Петыпы, і рэдакцыя Пятра Гусева, больш дынамічная, сучасная, але з меншай колькасцю танцаў. У мінскай рэдакцыі балета будзе прадстаўлены сінтэз дзвюх версій. У спектаклі можна будзе ўбачыць і аўтарскую харэаграфію Вячаслава Хамякова ў стылістыцы гэтага балета, і Марыуса Петыпы. Як адзначае балетмайстар-пастаноўшчык, „зразумела, што я ні ў якім разе не лічу сябе роўным гэтаму генію танца, але спроба падрыхтаваць і паставіць варыяцыі, адажыа ў стылі майстра зроблена”. Наколькі гэта атрымалася ўдала, пакажа сам спектакль.
Дырыжор-пастаноўшчык новага балета Вялікага тэатра – заслужаны дзеяч мастацтваў Беларусі, уладальнік медаля Францыска Скарыны Мікалай Калядка. Мастак-пастаноўшчык – народны мастак Расtі, лаўрэат Дзяржаўнай прэміі Беларусі Вячаслаў Окунеў.
Балет „Карсар” Адольфа Адана ўпершыню быў паказаны ў 1856 годзе ў тэатры Парыжскай оперы – з таго часу ён захоўваецца ў рэпертуары многіх тэатраў свету і нараўне з іншым знакамітым шэдэўрам кампазітара – балетам „Жызэль” уваходзіць у залаты фонд сусветнага балетнага рэпертуару. Лібрэта балета „Карсар” створана Жулем Анры Вернуа дэ Сен-Жоржам і Жозефам Мазілье па матывах паэмы Джорджа Гордана Байрана. Аднак лібрэта адрознівалася ад паэтычнага арыгінала – гэта, хутчэй, версія падзей, якія адбываліся да пачатку гісторыі, выкладзенай у паэме Байрана. Заблытаны сюжэт з прыгодамі, мяцяжамі, паядынкамі, выкраданнямі і ўцёкамі, разгортваўся на фоне марской прасторы, у мітусні ўсходняга базару і ў султанскім гарэме. У 1858 годзе „Карсар” быў перанесены ў Пецярбург: у Вялікім (Каменным) тэатры сваю рэдакцыю паказаў французскі балетмайстар Жуль Перо. У ролі Конрада выступіў Марыус Петыпа, і на наступнае дзесяцігоддзе гэта роля стала яго кароннай. У тым жа спектаклі Петыпа выступіў і як балетмайстар, сачыніўшы дуэт Pas d`esclave на спецыяльна напісаную музыку прынца Альдэнбургскага. Артыст ужо даўно спрабаваў сябе як балетмайстар і ў 1863 годзе ў Марыінскім тэатры ажыццявіў самастойную пастаноўку балета „Карсар”.
