Сяргей Тарасаў: Полацак – безумоўна выток беларускай дзяржаўнасці
Гісторыя беларускай дзяржаўнасці. Вядомы беларускі гісторык і археолаг Сяргей Тарасаў прачытаў лекцыю пра вытокі беларускай дзяржаўнасці каля сценаў полацкага Сафійскага сабора.
Кажа Сяргей Тарасаў:
– Што мяне таксама матывавала: зараз няпростыя часы нашай дзяржавы, хто яго ведае, заўтра ў якой дзяржаве мы прачнемся, і таму хочацца нагадаць усё ж такі адкуль нашыя карані і што сапраўды на ўсходзе не нашыя старэйшыя браты і нават не нашыя сябры, з якімі мы не адно стагоддзе ваявалі. Безумоўна Полацак – гэта выток беларускай дзяржаўнасці. І лекцыя была прысвечаная менавіта вытокам беларускай дзяржаўнасці: як яна складалася, з чаго яна складалася, чым яна вылучалася, чым яна адрознівалася ад астатніх.
Лекцыя сабрала каля 60 чалавек і доўжылася дзве гадзіны. Сяргей Тарасаў расказаў пра асаблівасці ранняй гісторыі Беларусі і пра адметную ролю і значэнне Сафійскага сабора ў жыцці Полацкага княства.
Васіль Кроква, Беларускае Радыё Рацыя
