Тое, што нам блізка: «J:МОРС» і Symbal.by зрабілі народны кліп
У купальскія дні Symbal.by прадстаўляе прома-відэа на адмысловую летнюю версію песні «Блізка» гурта «J:морс» з удзелам ансамбля FolkRada. У роліку зняліся 150 чалавек з розных краін у адзенні з беларускай сімволікай.
Лепшая песня Беларусі па выніках нацыянальнай музычнай прэміі «Ліра» за 2016 год загучала ў абноўленай аранжыроўцы з даданнем яскравых купальскіх спеваў дзіцячага ансамбля FolkRada пад кіраўніцтвам Ірэны Катвіцкай.
Відэашэраг быў створаны Symbal.by на аснове фотаздымкаў у беларускім стылі, якія на заклік крамы дасылалі беларусы з розных куткоў Зямлі. Ролік візуальна распавядае пра «тое, што нам блізка».
– Нам штодзённа ва ўсіх сацыяльных сетках крамы дасылаюць мілыя фоткі ў беларускім стылі з нашымі і не толькі рэчамі, беларускім дэкорам, цікавымі элементамі, традыцыйнымі, гістарычнымі і нацыянальнымі сімваламі, – кажа кіраўнік Symbal.by Павел Белавус. – Для ўздыму настрою проста хапае націснуць тэг #symbalby у інстаграме і тысячы прыгожых людзей глядзяць на цябе з фотаздымкаў, якія даказваюць, што Беларусь жыве ды мае свае карані і традыцыі, якія нас усіх аб’ядноўваюць. Пра што і спявае Уладзімір Пугач у сваёй песні.
Арыгінальная версія песні «J:МОРС» «Блізка» выйшла ў снежні 2016. Гэта першы сінгл з новага альбома калектыву, які мае выйсці ўвосень 2017.
