Ці з’явіцца ў Косаве помнік Касцюшку? (абноўлена)
Гісторык Павел Дайлід лічыць вельмі слушнай прапанову грамадскага аб’яднання „Таварыства беларускай мовы імя Францішка Скарыны” да Міністэрства культуры годна ўшанаваць памяць Тадэвуша Касцюшкі.
Аб’явіць конкурс на выраб коннай скульптуры Касцюшкі, якую можна ўстанавіць у Менску, а таксама на яго малой радзіме ў горадзе Косаве Берасцейскай вобласці. Кажа Павел Дайлід:
– У Беларусі няма ніводнага помніка Тадэвушу Касцюшку! Калі не лічыць усталяваны помнік на тэрыторыі амбасады ЗША. А тым часам, памяць Касцюшкі ўшанаваная па ўсім свеце.
Жыхары Косава вельмі станоўча аднесліся да гэтай прапановы:
– Мы толькі за гэта!
– А грошы на помнік трэба збіраць з людзей, так?
– Хай паставяць. У нас ужо ёсць яму памятны знак, тут ягоная сядзіба знаходзіцца.
На думку Паўла Дайліда, наўрад ці Міністэрства з аптымізмам успрыме прапанову і пагодзіцца з ёю, улічваючы цяжкую эканамічную абстаноўку ў краіне.
[Not a valid template]
* * *
Усталяваць конную скульптуру Тадэвуша Касцюшкі ў Косаве на Берасцейшчыне – такую ідэю падтрымліваюць прадстаўнікі берасцейскай абласной арганізацыі Беларускай Сацыял-Дэмакратычнай партыі (Грамада). Прапанову з’яўлення аб’екту агучыла Таварыстава беларускай мовы імя Францішка Скарыны, – паведаміў палітык Ігар Маслоўскі:
– Мы просім органы выканаўчай і прадстаўнічай улады садзейнічаць пашырэнню спадчыны Тадэвуша Касцюшкі і годна ўшанаваць ягоную памяць. Такімі мерапрыемствамі цягам года могуць быць усталяванне коннай скульптуры Касцюшкі на яго малой радзіме ў горадзе Косаве, назва шэрагу вуліц у яго гонар у населеных пунктах Берасцейскай вобласці, тэматычныя канферэнцыі, віктарыны, конкурсы, выданне тэматычнай літаратуры.
Таксама актывісты накіравалі зварот ад імя абласной арганізацыі партыі ў Берасцейскі абласны выканаўчы камітэт і Савет дэпутатаў з прапановамі правесці шэраг мерапрыемстваў з нагоды 270-ай гадавіны народзінаў Тадэвуша Касцюшкі.
Беларускае Радыё Рацыя, Берасце
Глядзіце таксама
