Тыдзень Швецыі 2019
Напярэдадні Дня Швецыі ў Менску, які адбудзецца 1 чэрвеня на плошчы Свабоды, Пасольства Швецыі супольна з партнёрамі запрашае ўсіх аматараў кіно наведаць паказы шведскіх фільмаў у кінатэатры “Піянер” (вул. Энгельса, 20).
З 23 па 26 траўня ў малой зале кінатэатра «Піянер» у рамках праграмы «Лістапад. Калекцыя» пройдзе паказ мастацкіх стужак «Другое жыццё Увэ» і «Тут была Брыт-Мары» паводле раманаў майстра шведскага аптымізму Фрэдрыка Бакмана. Паказ арганізаваны Цэнтрам візуальных і выканаўчых мастацтваў «АРТ Карпарэйшн» у супрацоўніцтве з Пасольствам Швецыі. Праграму можна паглядзець тут: http://www.artcorporation.by/news/backman/
З 23 траўня па 3 чэрвеня ў фае кінатэатра “Піянер” будзе праходзіць фотавыстава «Moments», прадстаўленая Volvo Car Мінск – афіцыйным дылерам ТАА «Вольво Карс». Усе фотаздымкі былі зробленыя з дапамогай штатнай камеры фірмовай сістэмы бяспекі Volvo City Safety, усталяванай у красоверы Volvo XC60.
27 траўня Цэнтр актыўнага даўгалецця (г. Менск) і Пасольства Швецыі запрашаюць на майстар-клас па скандынаўскай хадзе. Цэнтр актыўнага даўгалецця – арганізацыя, якая аб’ядноўвае энергічных людзей узросту 50+. Мерапрыемства пачнецца ў памяшканні Пасольства Швецыі (вул. Рэвалюцыйная, 15) а 17.00. Папярэдні запіс па тэлефоне +375 29 162-25-25.
27 траўня распачнецца штогадовы Тыдзень шведскага кіно. Усе паказы для наведнікаў бясплатныя. Квіткі можна атрымаць у касах кінатэатра ў дзень паказу з 12.00. Стужкі дэманструюцца на мове арыгіналу з беларускімі субтытрамі. З падрабязнай праграмай Тыдня шведскага кіно можна пазнаёміцца па спасылцы http://kinominska.by/news/tydzen-shvedskaga-kino-kinateatry-piyaner
28 траўня а 18.00 у памяшканні Пасольства Швецыі (вул. Рэвалюцыйная, 15) адбудзецца прэзентацыя беларускага перакладу кнігі “Звяры, якіх не бачыў ніхто, апроч нас” Ульфа Старка і Лінды Бундэстам. Перакладчыца Алеся Башарымава распавядзе пра тое, як аўтары стваралі кнігу-карцінку пра нябачаных звяроў, пра цікавыя моманты сваёй працы над перакладам, а таксама пачытае вершы з кнігі і раскажа, як кожны можа стаць яе сувыдаўцом. Таксама вы зможаце пагартаць кнігу ў арыгінале, прыдумаць уласных звяроў і задаць пытанні перакладчыцы. Каб трапіць на сустрэчу, патрэбна прайсці рэгістрацыю на https://forms.gle/Z8aGohjtFzmUKhiv5
29 траўня а 19.00 у канцэртнай зале “Верхні горад” (пл. Свабоды, 23а) адбудзецца канцэрт вядомага шведскага дуэта Duo Lasine-Sigova ў складзе дыпламанткі міжнародных конкурсаў і лаўрэаткі прэстыжных шведскіх прэмій піяністкі Юліі Сігавай і канцэртмайстра Опернага тэтра г. Мальмё і сімфанічнага аркестра г. Ёнчопінга скрыпача Антона Ласіна. У праграме прагучаць саната для скрыпкі з фартэпіяна Вільгельма Стэнхамара, творы Тура Аўліна, мініяцюры Фіні Хенрыкеса, а таксама саната Эдварда Грыга для скрыпкі з фартэпіяна сач.8. https://www.kvitki.by/rus/bileti/muzyka/vecher-skandinavskoj-muzyki-283134/
1 чэрвеня а 19.00 у малой зале Беларускай дзяржаўнай філармоніі пры падтрымцы Пасольства Швецыі адбудзецца канцэрт сучаснай шведскай харавой музыкі «Фарбы Поўначы. Швецыя», у якім возьмуць удзел госпэл-хор «Svart på vitt» (Швецыя, дырыжор Ёакім Арэніюс), Мінскі Госпэл Хор (дырыжор Павел Шведаў), госпэл-хор «Open Door» (Санкт-Пецярбург, дырыжор Ніна Елішава), а таксама камерны аркестр «Capella Accademia». Дырыжор праекта – Аляксей Фралоў. https://philharmonic.by/by/concert/farby-pounachy-shvecyya
Паводле Прэс-рэлізу Пасольства Швецыі ў Рэспубліцы Беларусь
