У Беларусі з’явіўся першы помнік Алесю Адамовічу
У пасёлку Глуша Бабруйскага раёна адбылося адкрыццё бюста выбітнаму пісьменніку Алесю Адамовічу. Гэта першы ў Беларусі помнік пісьменніку. Бюст усталявалі каля мясцовага Дома культуры.
Хоць Адамовіч нарадзіўся на Копыльшчыне, але сваёй малой Радзімай пісьменнік лічыў менавіта Глушу, там, дзе прайшло яго дзяцінства. Шматлікія тутэйшыя мясціны і жыхары сталі героямі яго кніг. Пахаваны Адамовіч на тутэйшых могілках.
Андрусь Архіпенка
Ініцыятарамі ўстаноўкі бюста выступіла ініцыятыўная група па ўвекавечанні памяці Алеся Адамовіча. Яны займаліся зборам грошай на помнік праз краўдфандынг з 2018 года. Курыраваў праект грамадскі актывіст Андрусь Архіпенка.
Скульптар Генік Лойка
Бюст быў зроблены вядомым беларускім скульптарам Генікам Лойкам, які таксама прысутнічаў на ўрачыстым адкрыцці.
Нагадаем, у Глушы ўжо шмат гадоў спрабуюць стварыць музей Адамовіча, але грошай на гэта пакуль не хапае, таму збор сродкаў працягваецца.
Алесь Адамовіч — беларускі пісьменнік, літаратуразнаўца, грамадскі дзеяч. Быў адным з першых, хто падняў тэму Чарнобыльскай катастрофы ў сапраўдных яе маштабах. Аўтар кніг пра вайну «Вайна пад стрэхамі», «Сыны ідуць у бой», «Хатынская аповесць», «Я з вогненнай вёскі» і інш. Творы Адамовіча перакладзены больш чым на 20 моваў свету.
Глядзіце таксама
