У Берасці адбылася прэзентацыя кнігі Анатоля Трафімчыка
У Берасці прэзентавалі кнігу гісторыка Анатоля Трафімчыка “1939 год і Беларусь: забытая вайна”. У культурніцкім цэнтры “Грунтоўня” сабралася, у асноўным, ангажаваная мясцовай гісторыяй аўдыторыя, каб паслухаць аўтарскі каментар да кнігі і набыць яе.
Апошняе немалаважна, улічваючы, што ў сетцы дзяржаўных кнігарняў кніга, па словах выдаўца Андрэя Янушкевіча, забаронена да рэалізацыі.
Разам з тым Анатоль Трафімчык запэўнівае, што якраз берасцейцам яго праца павінна быць цікавай, бо грунтуецца ў многім на тутэйшым матэрыяле.
– Па гэтым мясцовым каларыце, як вы кажаце, можна прасачыць, прамацаць нават, як канкрэтныя людзі жылі ў той час і што перажывалі.
Мясцовы каларыт кнізе надае і той факт, што сам аўтар нарадзіўся на тэрыторыі цяперашняй Берасцейшчыны, ці гістарычнай Наваградчыны, як заўважае Анатоль Трафімчык.
“Кніга “1939 год і Беларусь: забытая вайна” разглядае пачатак другой сусветнай вайны з рацыі беларускіх палітычных і нацыянальных інтарэсаў”, – чытаем у анатацыі. Выданне служыць папулярызацыі айчыннай гісторыі сярод шырокага кола беларусаў.
Алеся Лугавая, Беларускае Радыё Рацыя, Берасце
Фота vk.com/gruntounia
Глядзіце таксама
