У Берасці прэзентавалі „Узоры роднага краю”
Кнігу “Узоры роднага краю” прэзентавалі ў берасцейскай краме нацыянальных рэчаў “Князь Вітаўт”.
Пра гэта паведаміў саўладальнік крамы Сяржук Бахун. Кніга рыхтавалася высілкамі маларыцкага рамесніка Антона Талашкі:
– Мы працуем з Алесем Мазанікам. Мы паразмаўлялі, ён гэта падхапіў, бо ведае людзей у друкарні. Я займаюся сваёй часткай, ён – сваёй. Ні ў аднаго з нас галава не баліць. Кожны з нас ведае, што ён робіць. Пасля ўзнікла ідэя, каб кожны чалавек, які зацікаўлены ў гэтым, дапамог і атрымаў гэтую кнігу.
Збор сродкаў на выданне ажыццяўляўся праз краўндфандынгавую платформу “Талака”.
У кнізе можна пабачыць фотаздымкі моладзі ў арнаментаванай, але сучаснай вопратцы, з кароткім апісаннем гісторыі і геаграфіі распаўсюду арнаменту.
Раней, 5 жніўня, выданне прэзентавалі для жыхароў сталіцы ў гандлёвым цэнтры “Купалаўскі”.
Беларускае Радыё Рацыя, Берасце
Глядзіце таксама
