У Чарнігаве прайшоў вялікі канцэрт BRUTTО
Выступы беларускага гурту BRUTTО, які сёлета перабраўся жыць ва Украіну, нязменна маюць вялікі поспех.
На канцэрты прыяжджаюць і беларускія аматары творчасці Сяргея Міхалка і яго калегаў-музыкаў.
Ва ўкраінскім Чарнігаве, памежным з Беларуссю, прайшоў вялікі канцэрт BRUTTО. У натоўпе традыцыйна луналі і бел-чырвона-белыя сцягі. Наш украінскі карэспандэнт Марцін Война пагутарыў з беларускім студэнтам Канстанцінам, які прыехаў на канцэрт з Менска, і з чарнігаўскім студэнтам Іванам.
РР: Ты прыехаў на канцэрт ажно з Менска. Чаму?
Канстанцін: Таму што творчасць музыкаў у Беларусі забароненая. Толькі ва Украіне ці ў Расеі. Хаця і ў Расеі іх таксама ўжо не паслухаеш.
РР: На канцэрце прагучаць і песні з новага альбома музыкаў. Ты прыехаў і за гэтым?
Канстанцін: Не толькі. Увогуле, гэта мае ўлюбёныя музыкі, і я заўсёды адсочваю іх творчасць. А яшчэ мне падабаецца ска-панк, які яны граюць.
РР: Ты прыехаў з Беларусі, а там па расейскіх тэлеканалах расказваюць розныя жахі пра Украіну. Што ты можаш сказаць пра тое, што бачыш у Чарнігаве?
Канстанцін: Я быў у Чарнігаве шмат разоў, і мне вельмі падабаецца гэты класны горад! Нічога не змянілася: такія ж добрыя людзі. Горад мне вельмі падабаецца. Ніякіх злосных “бандэраўцаў, якія збіваць тых, хто размаўляе на расейскай”, я тут не бачыў.
РР: У Менску цябе потым, напэўна, будуць пытацца пра жыццё ва Украіне. Што ты скажаш?
Канстанцін: Па-моему, людзі сталі жыць лепш, як гэта не дзіўна гучыць. Не таму, што палепшылася эканамічная сітуацыя: наадварот, пагоршылася, бо ва Украіне цяпер вайна. І ўвогуле хрэнова. Але ментальнасць украінцаў моцна змянілася, і людзі сталі дабрэйшымі.
РР: Чаму BRUTTО такія папулярныя ва Украіне?
Іван: Іх хіт “Воіны світа” стаў неафіцыйным гімнам Майдана.
РР: А чаму, на твой погляд, музыкі пераехалі жыць з Беларусі ва Украіну?
Іван: У Беларусі няма свабоды, там дыктатура. Таму Міхалок са сваім гуртам і змушаны быў перабрацца сюды, дзе свабоды значна больш.
РР: На гэтым канцэрце ёсць госці і з Беларусі. Але ж пэўная частка беларусаў і пагэтуль баіцца ездзіць ва Украіну. Чаму так, на тваю думку?
Іван: У Беларусі ёсць людзі, якія лічаць, што ва Украіне трымаюць рэй фашысты, якія прыгнятаюць расейскамоўнае насельніцтва. Гэта ўсё брахня.
РР: А дзе выйсце, як ты думаеш?
Іван: Адзінае выйсці – проста не глядзець расейскія тэлеканалы.
Ужо пасля канцэрту давялося перагаварыць з немаладой чарнігаўчанкай Аляксандрай Рыгораўнай. Вось што яна сказала:
РР: Што вы можаце сказаць пра беларускіх гасцей?
Аляксандра Рыгораўна: Хай беларусы прыяжджаюць да нас. Я ў гэтым горадзе нарадзілася, і заўсёды мы ездзілі ў Гомель і з дачкой, і з унучкай. Гамяльчане заўсёды ездзілі да нас. А ім там цяпер прамываюць мазгі, што ў нас фашызм. Гэта ўсё няпраўда. Я вельмі люблю Беларусь. Яшчэ, калі была школьніцай, слухала па радыё “Паўлінку”. І беларуская мова для мяне як мелодыя.
Новы альбом гурта BRUTTО “Родны край” будзе прэзентаваны 4 кастрычніка ў Варшаве.
Марцін Война, Беларускае Радыё Рацыя.
