У Дзятлаве прапанавалі паставіць помнік Канстанціну Астрожскаму
У Дзятлаўскім гісторыка-краязнаўчым музеі адбылася прэзентацыя альбома беларускага кераміста, жывапісца і скульптара, сябра Саюза мастакоў Беларусі Мікалая Несцярэўскага “Яшчэ не ўсё зрабіў…”, які ў канцы мінулага года выйшаў з друку ў Менску.
Мікалай Несцярэўскі родам з Беласточчыны, але ў дзяцінстве разам з бацькамі аказаўся рэпатрыянтам і быў выселены па-за межы роднай Беласточчыны і апынуўся ў Дзятлаве. Тут ён і пражыў большую палову свайго жыцця. Цяпер мастак жыве ў Менску.
На прэзентацыі альбома Мікалая Несцярэўскага выступалі яго землякі, сябры, супрацоўнікі музея, якія шчыра віталі таленавітага мастака і віншавалі яго з выхадам унікальнага альбома твораў мастака. Дзятлаўчанін Валерый Петрыкевіч і святар з Дзятлава Мікалай Пінчук прапанавалі скульптару зрабіць макет будучага помніка Канстанціну Астрожскаму – гетману Вялікага Княства Літоўскага, дзяржаўнаму дзеячу, мецэнату, заснавальніку Дзятлава. А потым знайсці сродкі і зрабіць помнік Канстанціну Астрожскаму і ўстанавіць яго ў 2020 годзе ў Дзятлаве. Мастак Мікалай Несцярэўскі паабяцаў землякам выканаць іх просьбу. Усе прысутныя падтрымалі гэтую добрую ідэю.
Барыс Баль, Беларускае Радыё Рацыя, Дзятлава
