У Гародні наблізіліся да “загадкі Кастуся Каліноўскага”
Гарадзенская галерэя “Крыга” стала месцам прэзентацыі матэрыялаў міжнароднай навуковай канферэнцыі “Кастусь Каліноўскі і нацыятворчы працэс у Беларусі”, якая адбылася вясной мінулага года ў Лондане. Пад адной вокладкай сабраныя гістарычныя працы больш чым дзесяці аўтараў з Беларусі, Польшчы, Англіі і Літвы, якія прысвечаныя постаці Кастуся Каліноўскага як аднаго з правадыроў паўстання 1863 года і яго ролі ў гісторыі.
Менавіта спрэчкі на гэтую тэматыку, па словах аднаго з аўтараў кнігі, доктара гістарычных навук Алеся Смалянчука, не спыняюцца да гэтыга часу:
– Польска-расейскае змаганне ўвесь час уплывала на нашую гісторыю. Камусьці хацелася паказаць Каліноўскага не беларускім, а польскім героем, камусьці – наадварот. Усё было вельмі складана і няпроста. Але, я думаю, што ўсё ж такі беларуская гісторыяграфія зрабіла ўжо шмат і мае добрыя перспектывы выйсці на такі аб’ектывісцкі вобраз Каліноўскага, які не будзе супярэчыць вобразу Каліноўскага як беларускага героя.
Сярод аўтараў кнігі – вядомыя навукоўцы, такія як гарадзенскія гісторыкі Алесь Смалянчук і Алесь Радзюк, Арнольд Макмілін з Лондану і Дарота Міхалюк з Торуня. Зборнік матэрыялаў міжнароднай навуковай канферэнцыі “Кастусь Каліноўскі і нацыятворчы працэс у Беларусі” пабачыў свет на дзвюх мовах – беларускай і ангельскай.
[Not a valid template]
Беларускае Радыё Рацыя, Гародня
Глядзіце таксама
