У Гародні з’явілася бібліятэчка альманаху „Новы Замак”
Першай кнігай серыі стаў зборнік Самсона Пярловіча – паэта, ахвяры сталінізму, беларускага патрыёта з Наваградка – „Такі непаўторны сусвет”.
У зборнік увайшлі таксама публікацыі літаратараў Гарадзеншчыны, якія згадваюць асобу і час змагання і пакутаў Самсона Пярловіча, які, як і Ларыса Геніюш, аказаўся нязломным у адстойванні беларускай нацыянальнай ідэі.
Кажа Валянцін Дубатоўка, старшыня абласной арганізацыі Саюзу беларускіх пісьменнікаў:
– Калі ён напісаў супраць Сталіна, то Цанава захацеў пабачыць спачатку гэты верш, а потым гэтага чалавека. Яго прывезлі ў Менск, каб паказаць Цанаву, хто ж такі смелы хлопец, які супраць Сталіна напісаў верш. Уяўляеце, якая сітуацыя. Гэтую кнігу ўкладаў Янка Траццяк, галоўны рэдактар нашага альманаху і галоўны рэдактар і ўкладальнік гэтай кнігі. Збіралі матэрыялы ўсе нашыя пісьменнікі Гарадзеншчыны. Тут матэрыялы і Сяргея Чыгрына, і Святланы Абдулаевай, і шмат хто яшчэ даваў матэрыялы.
Кніга Самсона Пярловіча, як і чарговы нумар часопісу „Новы Замак”, будуць прэзентаваны 23-га сакавіка ў Цэнтры гарадскога жыцця, па гарадзенскім адрасе: вуліца Кірава дом 3.
Кніга Самсона Пярловіча выйшла малым накладам, і набыць яе можна будзе ў Гародні і Наваградку, дзе пройдуць прэзентацыі.
Якуб Сушчынскі, Беларускае Радыё Рацыя
