У Індуры прайшоў фестываль польскай харавой музыкі
Непрызнаваны ўладамі Саюз палякаў на Беларусі арганізаваў першы фестываль польскай харавой музыкі “Над Нёмнам – 2015”. Мерыпрыемства адбылося у мясцовасці Індура на Гарадзеншчыне, а канцэртнай залай стаў касцёл Найсвяцейшай Троіцы.
У фестывалі прынялі ўдзел пяць харавых калектываў -тры з Менску і два з Гародні. Як зазначае старшыня аддзелу культуры Саюза палякаў Вераніка Шарэйка, фестываль у першую чаргу павінен спрыяць папулярызацыі польскай песні на Беларусі:
– Асноўная мэта, каб польскія хоры сустракаліся, знаёміліся, каб працягвалі гэтую інтэграцыю. Каб як мага больш людзей хацелі спяваць.
Віктар Ахраменка:
– Мы спяваем польскія творы, але ж, канешне, мы – беларусы. І мы абавязкова выконваем твор “Магутны Божа”.
Юля Маркевіч:
-У хоры “Голас душы” я спяваю з 90-х гадоў. Такія фестывалі вельмі патрэбныя. Нават добра, што ён праходзіць не ў вялікім горадзе, а ў мястэчку, куды маглі прыйсці мясцовыя жыхары і паслухаць гэтую музыку.
Падчас фестывалю прагучалі творы рэлігійнай і патрыятычнай тэматыкі, а таксама польскія народныя песні і папулярныя музычныя мелодыі сучасных аўтараў. Фестываль польскай харавой музыкі ў будучым абяцае стаць штогадовым і праходзіць у розных мясцовасцях Беларусі.
[Not a valid template]
Беларускае Радыё Рацыя, Індура
