У Менску прэзентуюць польскі нумар часопіса „Мастацтва”
24 кастрычніка а 18-й гадзіне ў Галерэі Міхаіла Савіцкага (пл. Свабоды, 15) адбудзецца прэзентацыя спецыяльнага нумара часопіса “Мастацтва” (№9/2019), прысвечанага польскай культуры.
Мнагарукія піяністы, рэжысёры-правакатары, амазонкі танцавальнага авангарду, скрыпачы-русалкі і – вядома ж! – Манюшка апанавалі старонкі спецыяльнага нумара “Мастацтва” да 25-гадовага юбілею Польскага інстытута ў Мінску.
Гэта нумар да юбілею, але без наўмысна ўрачыстых інтанацый.
Гэта нумар пра нервы і болевыя кропкі сучаснай польскай культуры.
І кожны з аўтараў “Мастацтва” падрыхтаваў сваю “польскую” інструкцыю да дзеяння для беларускага чытача. Алеся Белявец і Любоў Гаўрылюк прапануюць наведаць цэнтры сучаснага арту – Замак Уяздоўскі ў Варшаве і Музей мастацтва ў Лодзі, Месяц фатаграфіі ў Кракаве і Біенале медыямастацтва ў Вроцлаве.
Дзмітрый Падзбярэзскі распавядзе пра незабыўны экспірыенс на Open’er’ы ў Гдыні, а Ганна Лянькова – пра ўласныя прыгоды на фестывалі “Варшава Зінгера”.
Усіх ахвотных распачаць уласную тэатральную справу натхніць найпадрабязны расповед Жаны Лашкевіч аб тым, як жывуць, спаборнічаюць і фінансуюцца найлепшыя прыватныя тэатры Варшавы.
А вось як функцыянуе сапраўдная кінашкола, растлумачыць Антон Сідарэнка – на прыкладзе Школы фільмовай у Лодзі.
Гартаем новы нумар пад спевы Віктара Шалкевіча і абмяркоўваем разам з аўтарамі 24 кастрычніка а 18-й у Галерэі Савіцкага!
УВАХОД НА МЕРАПРЫЕМСТВА ВОЛЬНЫ
