У назве вуліц – гісторыя горада
На пяці цэнтральных вуліцах Берасця могуць з’явіцца шыльды, альбо пюпітры з іхнымі гістарычнымі назвамі. Адбудзецца гэта ў межах праекта “У назве вуліц – гісторыя горада”, які рэалізуе мясцовы Музей гісторыі горада, Берасцейская гарадская жыллёва-камунальная гаспадарка і газета “Вячэрняе Берасце”. Падрабязней апавядае дырэктарка музея Святлана Тамчук:
– Галоўная мэта нашага праекту – увекавечванне гістарычных тапонімаў горада. Вуліцы настолькі часта мянялі свае назвы ад таго, як мянялася ўлада, а знаходзячыся на мяжы, яна мянялася часта. І ў першую чаргу пачыналі перайменаванне вуліц. Калі мы ўвайшлі ў склад Расейскай імперыі, былі адны назвы вуліц, калі ўвайшлі ў склад Другой Рэчы Паспалітай, – другія назвы вуліц. Я маю на ўвазе нашу гістарычную частку. Мы не бярэм наш сярэднявечны горад, які быў зруйнаваны.
Найперш шыльды, альбо пюпітры з’явяцца на праспекце Машэрава, вуліцах Гогаля, Карла Маркса, Савецкай і Міцкевіча. Гэта закране перыяд з ХІХ па ХХІ стагоддзі. “Праект гэты доўгатэрміновы, а таму, пазней, падобныя шыльды могуць з’явіцца і на іншых вуліцах горада”, – зазначыла Святлана Тамчук. На якой мове будуць гістарычныя назвы вуліц і суправаджальная інфармацыя пра іх, рэалізатары праекту не ўдакладнілі.
Мікола Ляшкевіч, Беларускае Радыё Рацыя, Берасце
Фота brestcity.com
Глядзіце таксама
