У Пінску адбылася ўрачыстасць з нагоды 100-годдзя кардынала Свёнтка
У Пінску клуб аматараў польскай літаратуры і гісторыі правёў урачыстае паседжанне з нагоды 100-годдзя першага беларускага кардынала Казіміра Свёнтка (1914-2011).
Казімір Свёнтак спрыяў наладжванню культурна-асветніцкіх сувязяў Пінска з Польшчай.
Удзельніца клубу, Гэлена Шаламіцкая, якая прайшла праз сталінскія вязніцы, ўзгадвае Свёнтка, як сапраўднага душпастара:
– В 54-м годзе так атрымалася, што наша сям’я блізка з ім пазнаёмілася, бо хрысцілі дзіця. І знаёмыя мы былі шмат гадоў. Ведалі яго і, як чалавека мудрага і ў прыватных справах, а як ксяндза – то і словаў няма – прамаўляў пекныя казанні. Вельмі добра ставіўся да людзей. Вельмі яго шанавалі, вельмі любілі, засталіся найлепшыя ўспаміны пра нашага ксяндза-кардынала.
21 кастрычніка, ў дзень нараджэння іерарха, ў менскім ды пінскім касцёлах Найсвяцейшай Панны Марыі адбудзецца святая Імша ў гонар кардынала.
25 кастрычніка Чырвоны касцёл у Менску арганізоўвае пілігрымку ў Пінск, дзе спачыў кардынал.
Пятро Савіч, Беларускае Радыё Рацыя
Глядзіце таксама
