Улады вырашылі будаваць гістарычны музей у самым цэнтры Менска
Улады разгледзелі магчымыя варыянты пляцовак для будаўніцтва Нацыянальнага гістарычнага музея і прыйшлі да высновы, што аптымальным варыянтам з’яўляецца яго размяшчэнне каля цяперашняга будынка музея на вуліцы Карла Маркса.
Для гэтага прапануецца рэканструяваць і рэстаўраваць некаторыя суседнія будынкі і стварыць тут цэлы музейны квартал. Як стала вядома TUT.BY, цяпер апошняе слова за Аляксандрам Лукашэнкам.
Яшчэ ў пачатку 2019 года паведамлялася, што новы будынак Нацыянальнага гістарычнага музея збіраюцца пабудаваць насупраць стэлы на праспекце Пераможцаў.
Увесь мінулы год ішлі праектныя працы, але потым горад вырашыў разгледзець яшчэ некалькі варыянтаў пляцовак для размяшчэння музея, каб знайсці самую аптымальную.
Напрыклад — пабудаваць музей у раёне Даўгінаўскага гасцінца на поўначы Менска. Або стварыць яго ў ваколіцах цяперашняга будынка Нацыянальнага гістарычнага музея на вуліцы Карла Маркса, рэканструяваўшы суседнія будынкі.
І пасля прапрацоўкі ўсіх варыянтаў спецыялісты прыйшлі да высновы, што для забеспячэння максімальнай турыстычнай прывабнасці аптымальным з’яўляецца варыянт размяшчэння музея менавіта ў межах вуліц Маркса-Камсамольскай-Кірава. Тут мяркуецца стварыць цэлы музейны квартал, рэканструяваць і рэстаўраваць некаторыя будынкі.
Гэта прапанова цяпер павінна легчы на стол Аляксандра Лукашэнкі, за якім апошняе слова па гэтым пытанні.
