Услед за міліцэйскім Дзедам Марозам у Беларусі з’явіўся ваенны
У Беларусі з’явіўся ваенны Дзед Мароз. Яго рэзідэнцыя размясцілася на «Лініі Сталіна». Раней МУС паведамляла аб з’яўленні міліцэйскага Дзеда Мароза.
Пра з’яўленне ў Беларусі ваеннага Дзеда Мароза паведаміла прэс-служба Міністэрства абароны ў сваім тэлеграм-канале. Яго рэзідэнцыя размясцілася на тэрыторыі гісторыка-культурнага комплексу «Лінія Сталіна», піша Thinktanks.by.
Адметная асаблівасць ваеннага Дзеда Мароза заключаецца ў тым, што ён збірае пажаданні наведвальнікаў на будучы год у «капсуле жаданняў», зробленай са старой артылерыйскай гільзы.
Святочныя забавы ў гэтага персанажа таксама вельмі своеасаблівыя. Госці ваеннага «дзядулі» могуць пастраляць з пнеўматычнай вінтоўкі, пазнаёміцца з узбраеннем салдат Вялікай Айчыннай вайны, а таксама сфатаграфавацца ў тэматычнай фотазоне.
Раней паведамлялася аб запуску праекта «Ёлка дзіцячых жаданняў», у межах якога дзеці да 20 снежня маглі напісаць ліст міліцэйскаму Дзеду Марозу на адрас упраўлення інфармацыі і грамадскіх сувязяў МУС. У якасці падарункаў дзяцей чакала магчымасць пасядзець за рулём міліцэйскай машыны, правесці трэніроўку ў ціры або правесці час са службовым сабакам.
