Вінцук Вячорка прэзентаваў свае кнігі ў Глыбокім
Пра колькасць беларускамоўных глыбачанаў, дэсаветызацыю назваў і трапныя беларускія выслоўі гаварылі ў Глыбокім. Туды завітаў вядомы мовазнаўца Вінцук Вячорка з прэзентацыяй сваіх кніг „Па-беларуску“ і „Не сьмяшыце мае прыназоўнікі“.
Па словах Вінцука Вячоркі, горад Глыбокае яму падабаецца як у плане архітэктуры, стаўлення людзей, так і моўнай свядомасцю жыхароў:
– Рыхтуючыся да спаткання, я збіраў звесткі перапісаў. І чарговы раз пераканаўся, што беларуская мова ў свядомасці глыбачанаў не проста прысутная, але яны гэтую прысутнасць і маніфестуюць. Вельмі высокі працэнт тых, хто нават паводле афіцыйнага перапісу лічыць беларускую мову роднай, гаворыць на ёй і валодае ёй.
Падчас сустрэчы мовазнаўца распавёў і пра беларускі слоўнік земляка глыбачанаў – Вацлава Ластоўскага. Ён агучыў прыдуманыя Ластоўскім трапныя беларускія словы, якія ўжо ўвайшлі ў мову і назваў тыя, якія чакаюць свайго прызнання.
Напрыканцы імпрэзы прысутныя атрымалі кнігі і часопісы з аўтографам Вінцука Вячоркі.
Цалкам матэрыял слухайце ў далучаным гукавым файле:
Таццяна Смоткіна, Беларускае Радыё Рацыя
