Вольнае слова і праўду ліквідаваць немагчыма
У выніку ліквідацыі Беларускага ПЭН-цэнтра Саюз беларускіх пісьменнікаў выступіў з заявай. Заява Сакратарыята Грамадскага аб’яднання „Саюз беларускіх пісьменнікаў”.
9 жніўня 2021 года рашэннем Вярхоўнага суда быў ліквідаваны Беларускі ПЭН-цэнтр, адна з самых вядомых і аўтарытэтных арганізацый, якая многія гады аб’ядноўвала пісьменнікаў і дзеячаў культуры, абараняла іх правы. Дзяржаўныя органы адшукалі фармальныя падставы, каб ліквідаваць аб’яднанне, якое тры дзесяцігоддзі плённа працавала для беларускай культуры і літаратуры.
Беларускі ПЭН, заснаваны Васілём Быкавым, Рыгорам Барадуліным, Карласам Шэрманам, Святланай Алексіевіч, якая цяпер узначальвае яго, заўжды спавядаў прынцыпы свабоды слова і свабоды волевыяўлення. Ліквідуючы арганізацыю, Вярхоўны суд сцвердзіў, што гэтым канстытуцыйным правам і свабодам няма месца ў пісьменніцкім асяроддзі. Прызначанае на 11 жніўня такое ж ліквідацыйнае пасяджэнне для Беларускай асацыяцыі журналістаў пацвярджае, што гэтых жа самых правоў не могуць мець і супрацоўнікі незалежных медыя.
Нагадаем, што і Грамадскае аб’яднанне «Саюз беларускіх пісьменнікаў» на сёння знаходзіцца пад пагрозай ліквідацыі пасля вобшуку і блакавання рахунку Следчым камітэтам Рэспублікі Беларусь, а таксама двух папярэджанняў ад Міністэрства юстыцыі Рэспублікі Беларусь за «несвоечасовае прадастаўленне запатрабаваных дакументаў», якія мы прадаставіць не можам у сувязі з тым, што памяшканне офіса апячатана.
Выкараняючы любыя праявы іншадумства, ліквідуючы недзяржаўныя арганізацыі, газеты, блакуючы сайты, знявольваючы сотні журналістаў, пісьменнікаў, блогераў, музыкаў, акцёраў – усіх, хто адважыўся сказаць хоць слова насуперак, дзяржаўныя органы сцвярджаюць, што яны кіруюцца законам. Аднак гісторыя чалавецтва не раз праходзіла такія этапы, калі пад выглядам закона чынілася беззаконне.
Сакратарыят Грамадскага аб’яднання „Саюз беларускіх пісьменнікаў” пратэстуе супраць ліквідацыі Беларускага ПЭН-цэнтра, жорсткага парушэння правоў і свабод беларускіх літаратараў, усіх грамадзянаў Беларусі.
Патрабуем ад уладаў выканання замацаваных у Канстытуцыі базавых прынцыпаў права. Можна ліквідаваць арганізацыю, але вольнае слова і праўду пра наш час ліквідаваць немагчыма. Менск, 10.08.2021
Беларускае Радыё Рацыя
Глядзіце таксама
