Вольныя Купалаўцы прэзентавалі пастаноўку, прысвечаную палітвязням
У Варшаве Вольныя Купалаўцы прэзентавалі пастаноўку, прысвечаную беларускім палітвязням, „Слова з-за кратаў”. Цягам імпрэзы прагучалі іх біяграфічныя звесткі, выказванні і творчасць.
„Гэтую пастаноўку мы задумалі яшчэ ў 2021-м годзе”, – распавяла актрыса Валянціна Гарцуева:
– Мы не гналіся за тым, каб выкарыстоўваць толькі гучныя прозвішчы. Людзей сядзіць вельмі шмат, не ўсе прозвішчы на слыху. Мы выбіралі тое, што нам падабаецца, шчымлівыя вершы. Першы блок у нас з вершаў, якія бацькі адрасуюць сваім дзецям. Нам падалося, што гэта вельмі шчымліва, вельмі балюча, гэта павінна нешта прабіць нават у гледача, як ім цяжка.
Падчас пастаноўкі „Слова з-за кратаў” на экране ладзіўся тэматычны відэашэраг, падрыхтаваны мастачкай па пяску Аляксандрай Канафальскай.
Імпрэза адбылася ў Музеі Вольнай Беларусі. Яна была падтрыманая кіраўніком НАУ, намеснікам кіраўніцы Аб’яднагага Пераходнага Кабінету Паўлам Латушкам.
Беларускае Радыё Рацыя
