Выданне „Язычніцтва старажытных беларусаў” прадставілі ў Менску
Кніга напісана сумесна этнографам, краязнаўцай Ірынай Клімковіч, і археолагам Людмілай Дучыц. Паводле апошняй, яна спадзяецца, што гэтая кніга будзе цікавай для чытачоў, і важнай для фармавання іх поглядаў на гісторыю Беларусі:
– Гэта нашы традыцыйныя этнічныя вераванні. Калі, напрыклад, чалавек на тэрыторыі Беларусі з’явіўся 10 тысяч гадоў таму назад, гэта калі цалкам тэрыторыя Беларусі была заселена. А хрысціянства прыйшло толькі тысячу гадоў таму назад. А ў вёсках увогуле недзе 600-700 гадоў таму назад. Таму гэтыя вераванні з эпохі паліаліта не зніклі.
Гэтыя старажытныя вераванні ўвайшлі ў хрысціянскую рэлігію, ян жывуць і сёння, – кажа Людміла Дучыц.
Паводле археолага, старшыні Таварыства Беларускай мовы Алега Трусава, важнасць кнігі ў тым, што беларусы становяцца еўрапейскай нацыяй – са сваімі мітамі ды паданнямі:
– Зараз мы ўжо дагналі і палякаў, і літоўцаў, і расейцаў, то бок мы ўжо сталі нацыяй. І гэтыя апошнія гады паказваюць, што гэтая нацыя пачынае сваю гісторыю не з 17-га году, а з бронзавага веку.
Паводле Алега Трусава, кніга дэманструе, што надыйшоў час не раскідаць камяні беларускай гісторыі і культуры, а збіраць іх.
Генадзь Барбарыч, Беларускае Радыё Рацыя
Глядзіце таксама
