Новы раман Віктара Марціновіча – у кнігарнях (абноўлена)
Сёння ў кнігарнях Беларусі павінен з’явіцца новы раман Віктара Марціновіча «Мова». Кніга пабачыла свет адразу ў дзвюх моўных версіях – па-беларуску і па-руску. Кажа Віктар Марціновіч:
– 10 верасня будзе адначасовы рэліз расейскамоўнай і беларускамоўнай версій у крамах “Белкнігі” па ўсёй краіне.
Заўтра ў менскай кнігарні «Логвінаў» абудзецца аўтограф-сесія Віктара Марціновіча. Раман «Мова» — гэта сацыяльная фантастыка. Падзеі ў рамане адбываюцца ў чатыры тысячы сямчот сорак першым годзе па кітайскім календары, калі ніякай Беларусі ўжо няма. Галоўным героем кнігі з’яўляецца беларуская мова.
* * *
Яшчэ да выхаду гэтай кнігі, яна абрасла легендамі і чуткамі. У Віктара Марціновіча выйшаў новы раман з загадкавай назвай „Мова”. Прычым кніга пабачыла свет адразу на двух мовах.
10 верасня ў менскай кнігарні „Логвінаў” адбудзецца аўтограф-сесія Віктара Марціновіча:
– Гэта навіна актуальная для беларускамоўнай версіі, якую зрабіў „Кнігазбор” у межах кампаніі „Будзьма беларусамі!”. Таксама яна актуальная для расейскамоўнага перакладу, які зрабіла выдавецтва 34mag.net у супрацы з выдавецтвам „Логвінава”. Пераклад падрыхтаваны Лідзіяй Міхеевай.
„Я вельмі спадзяюся пры дапамозе гэтага рамана прывабіць да беларускага свету нават тых, каму ён абыякавы, ці тых, хто пра яго ніколі не чуў”, – адзначае аўтар.
Васіль Кроква, Беларускае Радыё Рацыя
Глядзіце таксама
