Выстава “Беларусы ў Войску Польскім 1939-45” у Берасці
У мемарыяльным комплексе “Берасцейская крэпасць-герой” адбылося адкрыццё выставы “Беларусы ў Войску Польскім 1939-45”.
Яна была падрыхтавана беларускім гісторыкам, кандыдатам гістарычных навук Ігарам Мельнікавым, пры падтрымцы Пасольства Польшчы ў Рэспубліцы Беларусь, Генеральнага консульства Польшчы ў Берасці ў супрацоўніцтве з кіраўнітвам мемарыяльнага комплекса.
На адкрыцці выставы з вітальным словам выступіў пасол Польшчы ў Беларусі Конрад Паўлік:
– Гэты размешчаны над Бугам і Мухаўцом горад заўсёды быў важным гандлёвым транспартным цэнтрам, дзе перасякаліся тракты і водныя шляхі. Калі ў мірны час такое стратэгічнае размяшчэнне прыносіць даход і карысць, то падчас вайны яно становіцца крыніцай няшчасцяў. Берасце ў поўнае меры адчула гэта за час свайго існавання.
Па ацэнках Ігара Мельнікава ў Войску Польскім у перыяд з 39 па 45 гады служыла каля 70000 беларусаў.
“Безумоўна, гэта гістарычная падзея, што такая выстава нарэшце з’явілася ў крэпасці”, – зазначыў Ігар Мельнікаў:
– У абаронцаў Берасцейскай крэпасці быў свой Сяргей Смірноў, чалавек які напісаў гісторыю абаронцаў 1941 года, пра гісторыю тых падзей, які апісаў людзей пра якіх у Савецкім Саюзе забылі. А вось беларускія жаўнеры Войска Польскага, на жаль не знайшоўся такі чалавек у свой час, такі Смірноў беларускі, які б напісаў, расказаў пра іх гераізм. Прычым гэта не толькі Бераце, не толькі Берасцейская крэпасць, а гэта таксама ўсе падзеі верасня 1939 на тэрыторыі Заходняй Беларусі, на тэрыторыі Віленскага, Наваградскага, Палескага ваяводстваў Другой Рэчы Паспалітай. І гэта таксама Армія Андэрса.
Перад прысутнымі выступіла намеснік дырэктара мемарыяльнага комплекса Ларыса Бібік, нашчадкі ўдзельнікаў тых баёў у складзе Войска Польскага. Выстава будзе працаваць да 31 снежня 2016 года.
“Гэта першы крок да таго, каб мы беларусы ганарыліся гэтымі жаўнерамі Другой сусветнай вайны”, – паведаміў Ігар Мельнікаў.
Мікола Ляшкевіч, Беларускае Радыё Рацыя, Берасце
