Выстава ў Палацы Тызенгаўзаў у Паставах
Выстава, прысвечаная 230-годдзю з дня нараджэння беларускага арнітолага, графа Канстанціна Тызенгаўза і 200-годдзю з часу заснавання Пастаўскага арніталагічнага музея, адкрылася ў Палацы Тызенгаўзаў у Паставах. Мерапрыемства пачалося з гістарычнай інсцэнізацыі, а скончылася міні-канферэнцыяй з удзелам музейных супрацоўнікаў і ганаровых гасцей. Імпрэзу наведалі прафесар беларусістыкі з Варшавы Іосіф Зямчонак, член Акадэміі навук Беларусі , прафесар біяхіміі Андрэй Майсяёнак, прафесар біяхіміі Павел Пронька з Гародні.
На выставе прадстаўленыя здымкі супрацоўнікаў Пастаўскага раённага музея, фота літоўскіх калег, а таксама здымкі аднаго з найбуйнейшых даследчыкаў спадчыны Тызенгаўзаў, прафесара Іосіфа Зямчонка .
Па словах Іосіфа Зямчонка, Канстанцін Тызенгаўз у сузор’і еўрапейскіх даследчыкаў – зорка першай велічыні. Ён пакінуў пасля сябе спадчыну, якую і цяпер даследуюць дзясяткі навукоўцаў.
— Асоба, якую можна назваць прадстаўніком рэнесансу, шмаграннай, шматбакова адоранай талентамі. Гэта быў і навуковец, і мастак,і кампазітар — гэта быў чалавек шчырай душы і вялікага сэрца. Гэта быў сапраўдны навуковец, які пакінуў не толькі галіну навукі, створаную ягонай энергіяй і талентам, але таксама пакінуў спадчыну, якую сёння даследуюць дзясяткі навукоўцаў.
Пасля заканчэння біялагічнага факультэта Віленскага ўніверсітэта Канстанцін Тызенгаўз пасяліўся ў Паставах і да сваёй смерці ў 1853 годзе займаўся заалогіяй і арніталогіяй. Ён выпусціў трохтомную агульную арніталогію і сабраў каля 3 000 экспанатаў птушынага свету. Пасля ягонай смерці па волі ўладальніка змесціва музея перадалі ў Вільню.
І цяпер на біяфаку Вільнюскага ўніверсітэта захоўваюцца экспанаты з пастаўскага музея Тызенгаўза.
[Not a valid template]
Таццяна Смоткіна, Беларускае Радыё Рацыя
Фота аўтара
