Жыхар Ізраіля выдаў кнігу пра Слонімскі мясакамбінат
У Слонімскай друкарні свет пабачыла кніга жыхара Ізраіля Міхаіла Белкіна “Маё жыццё”, прысвечаная гісторыі Слонімскага мясакамбіната.
Справа ў тым, што Міхаіл Белкін з 1959-га да 2002-га года працаваў дырэктарам і намеснікам дырэктара Слонімскага мясакамбіната, якому аддаў разам 43 гады. Цяпер жыве ў Ізраілі. Але не парывае сувязей з роднай Беларуссю і прадпрыемствам у Слоніме.
87-гадовы спадар Белкін быў удзельнікам Другой сусветнай вайны. Родам ён з пасёлка Рубяжэвічы Стаўбцоўскага раёна. У брацкай магіле Рубяжэвічаў шмат ляжыць яго родных і блізкіх людзей, а таксама аднавяскоўцаў. За свае ўласныя сродкі ён нядаўна добраўпарадкаваў брацкую магілу і ўстанавіў абеліск.
У сваёй кнізе “Маё жыццё” аўтар распавёў аб пражытых гадах на Слонімшчыне, цікава расказаў пра ўсю гісторыю Слонімскага мясакамбіната, пра лёсы людзей, якія там працавалі, а таксама пра сённяшнія будні гэтага пралдпрыемства.
Кніга выдадзена на добрай паперы, у ёй шмат чорна-белых і каляровых фотаздымкаў.
Барыс Баль, Беларускае Радыё Рацыя, Слонім.
Глядзіце таксама
