Агляд прэсы: шлях у нікуды
Чаму ўварванне Расеі ва Ўкраіну ператварылася ў «стратэгічную катастрофу» для Беларусі. Visa і Mastercard прыпынілі сваю працу ў Расеі. Ізраіль не хоча псаваць адносіны ані з Украінай, ані з Расеяй. Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
«Пачнем з Беларусі, ключавой стартавай пляцоўкі для расейскага ўварвання і цяпер практычна ўжо не незалежнай дзяржавы. Вядома, што калі Захад увёў санкцыі пасля фальсіфікацыі выбараў 2020 года, дыктатар Лукашэнка прадаўся за пуцінскі рубель, каб застацца фінансава на плаву. Аднак беларускі лідар захаваў фігавы лісток незалежнасці, працягваючы адмаўляцца ад размяшчэння расейскіх войскаў на тэрыторыі сваёй краіны. Ну, цяпер гэта скончылася тым, што Беларусь стала галоўнай стартавай пляцоўкай для расейскага ўварвання ва Украіну. Акрамя таго, канстытуцыйны рэферэндум пайшоў яшчэ далей і ўхваліў меру, якая дазваляе размясціць расейскую ядзерную зброю ў Беларусі. Эканамічная, абаронная і знешняя палітыка краіны цяпер дыктуецца з Масквы», – падкрэслівае еўрапейскае выданне Lib Dem Voice.
«Ва Усходняй Еўропе таксама ёсць рух, дзе тры мэты Пуціна – Украіна, Малдова і Грузія – выступілі з заявамі, у якіх заявілі, што хочуць далучыцца да эканамічнай часткі Заходняга альянсу – Еўрапейскага звязу. Гэта азначала б перасячэнне яшчэ адной з часта абвешчаных Пуціным чырвоных ліній. Але сяброўства ўключае ў сябе больш, чым проста запыт «калі ласка, ці магу я далучыцца да вашага клуба». Звычайна гэты працэс займае гады, пакуль краіны-кандыдаты адаптуюць законы і нарматыўныя акты да патрабаванняў Брусэля і пераскокваюць праз абручы, звязаныя з дэмакратычнымі структурамі, правамі чалавека, незалежнай судовай сістэмай і мерамі барацьбы з карупцыяй. Запыт Украіны прагучаў падчас выступу прэзідэнта Уладзіміра Зяленскага на гэтым тыдні ў Еўрапарламенце. На прыліўнай хвалі эмацыйнай падтрымкі еўрапарламентарыяў заклікалі адважную Украіну паскорыць шлях да членства. Аднак група дэпутатаў пад кіраўніцтвам Францыі адзначыла, што, паводле Transparency International, Украіна з’яўляецца другой найбольш карумпаванай краінай у Еўропе (Расея – першай). Малдову падштурхнула да дзеяння прэс-канферэнцыя Лукашэнкі, на якой беларускі дыктатар прадэманстраваў карту, на якой Малдова была наступнай мэтай для ўварвання. У Малдове ўжо знаходзіцца 1,5 тысячы расейскіх вайскоўцаў, якія базуюцца ў расейскамоўным Прыднястроўі. Што да Грузіі, то яны чакалі поўнамаштабнага захопу Расеі з моманту захопу пуцінскіх танкаў Паўднёвай Асеціі і Абхазіі ў 2008 годзе.
Яшчэ адной шчылінай у антыпуцінскім альянсе з’яўляюцца паўднёваазіяцкія антаганісты Пакістан і Індыя, якія нейтральна схіляюцца да Масквы. Кітай працягвае ісці па ўкраінскім канаце, але пачынае крыху схіляцца да Кіева», – адзначае еўрапейскае выданне.
«Амерыканскія плацежныя сістэмы Mastercard і Visa прыпынілі сваю дзейнасць у Расеі ў сувязі з правядзеннем расейскай спецаперацыі на Украіне», – паведамляе нямецкая газета Frankfurter Allgemeine. Гэта азначае, што выпушчаныя ў Расеі карты гэтых кампаній не будуць прымацца за мяжой. Пры гэтым у расейскім ЦБ ужо заявілі, што ўсе выпушчаныя ў Расеі карты Mastercard і Visa будуць нармальна працаваць аж да заканчэння іх тэрміна дзеяння на тэрыторыі Расеі. Аднак расейцам, якія адпраўляюцца за мяжу, давядзецца выкарыстоўваць альтэрнатыўныя плацежныя сродкі. У сваёй афіцыйнай заяве расейскі Сбербанк падкрэсліў, што ўсімі картамі ў Расеі можна будзе карыстацца для зняцця грошай, ажыццяўляць грашовыя пераводы і аплачваць пакупкі.
Frankfurter Allgemeine піша, што патрабаванне аб спыненні дзейнасці Mastercard і Visa у Расеі вылучыў украінскі прэзідэнт Уладзімір Зяленскі падчас сваёй відэаканферэнцыі з сябрамі кангрэса ЗША. Акрамя таго, Зяленскі заклікаў да эмбарга на закупку расейскіх нафты і газу. Выданне нагадвае, што з моманту пачатку расейскай спецаперацыі шматлікія замежныя кампаніі прыпынілі сваю дзейнасць на тэрыторыі Расеі.
«Нафталі Бэнет – адзін з нямногіх прэм’ер-міністраў, якія падтрымліваюць добрыя адносіны і з Расеяй, і з Украінай, аднак менавіта з-за гэтага ён апынуўся перад выклікам», – піша нямецкая газета Handelsblatt. Ізраіль імкнецца не сапсаваць сваіх сувязяў з абедзвюма дзяржавамі і выступіць у якасці пасярэдніка паміж імі. Бэнет нечакана нанёс візіт у Крэмль, а затым адправіўся абмяркоўваць сітуацыю ва Украіне з канцлерам Германіі.
«Аб Ізраілі як аб пасярэдніку ва ўкраінскім крызісе гавораць ужо некаторы час. Краіна з’яўляецца адной з нямногіх, якія захавалі добрыя адносіны з Расеяй, ЗША і Украінай. З аднаго боку, Ізраіль можа раззлаваць свайго найважнейшага саюзніка, ЗША, калі не асудзіць расейскую спецаперацыю. Аднак калі Бэнет зробіць гэта, ён паставіць пад пагрозу свае добрыя адносіны з Масквой, а яны вельмі важныя для Ізраіля, які хоча прадухіліць іранскую прысутнасць у суседняй дзяржаве – Сірыі. Расея кантралюе паветраную прастору над Сірыяй і на гэты момант дазваляе ізраільскім ВПС бесперашкодна супрацьдзейнічаць Ірану ў Сірыі. З гэтай прычыны Бэнэт пакуль устрымліваецца ад крытыкі дзеянняў Уладзіміра Пуціна», – падкрэслівае выданне.
Дыпламатычны шлях Ізраіля таксама відавочна выявіўся на паседжанні Генеральнай асамблеі ААН, сцвярджае нямецкая газета. Ізраіль далучыўся да хору крытыкаў Расеі, але ўрад прадстаўляў не амбасадар краіны ў ААН, а ягоны намеснік. Мэта гэтага заключалася ў тым, каб зменшыць вагу заявы Ізраіля, якая была накіравана супраць Расеі.
«Украіна тым часам скардзіцца на адсутнасць падтрымкі з боку ізраільскага ўрада. Яна ўжо некалькі разоў звярталася па ваенную дапамогу, у якой Бэнет ёй адмаўляе, аддаючы перавагу абмяжоўвацца дастаўкай гуманітарных грузаў, якія трапляюць на Украіну праз Польшчу. Ізраіль неаднаразова прапаноўваў пасярэдніцтва ў перамовах па спыненні спецаперацыі ва Украіне. Станоўчая рэакцыя на гэтую прапанову паступіла з Кіева, але не з Масквы», – заключае нямецкая газета.
Агляд сусветнай прэсы падрыхтавала Вольга Сямашка
