Агляд тыдня
Увесь мінулы тыдзень беларусы, дый не толькі мы, гадалі што ж задумаў Лукашэнка з наймітамі-«вагнераўцамі» на беларускай зямлі.
Журналісты «Радыё Свабода» прааналізавалі мапы Гугла, і пабачылі каля вёскі Цэль пад Асіповічамі лагер, які можа змясціць мінімум дзевяць тысяч чалавек.
Галаву «Вагнера» Прыгожына так ніхто за тыдзень і не пабачыў. Толькі калі верыць Лукашэнку, галоўны вайсковы злачынца Расеі, афіцыйна мяцежнік і здраднік Радзімы, быў у Беларусі. Але верыць Лукашэнку – гэта сумнеўны ўчынак.
Шэраг палітычных аналітыкаў схіляюцца да таго, што не варта перабольшваць значнасць магчымага прыбывання «вагнераўцаў» у Беларусі.
Вострыя языкі жартуюць, што Лукашэнка паспрабуе іх перапрадаць як тыя «беларускія крэветкі» – назад у Расею пад відам беларускіх вайскоўцаў.
Калі больш су’рёзна, то разглядаецца версія, што пабудаваны лагер пад Асіповічамі – гэта перавалачная база для адпраўкі наймітаў назад у Афрыку. І што ў рэальнасці ў Беларусі могуць застацца адно невялікая колькасць інструктараў для лукашэнкаўскіх сілаў спецыяльных аперацый. Тых самых, якія ўдзельнічалі ў прыдушэнні Беларускай рэвалюцыі ў 2020 годзе.
У кожным разе, відавочна, што Лукашэнку ёсць што хаваць. Прычым, не толькі ад беларусаў, не толькі ад Захаду, але і ад Крамля.
Версія пра тое, што дыктатар паспрабуе палітычна перажыць Пуціна, таму імкнецца сябраваць з узаемнымі ворагамі ўнутры Расеі, выглядае цалкам праўдападобна.
***
На мінулым тыдні сайт і сацсеткі праекту «Будзьма беларусамi» прызнаныя «экстрэмісцкімі». Цалкам культурніцкі праект, скіраваны на папулярызацыю беларускай гісторыі і сучаснай культуры ёсць экстрэмісцкім.
Я схільны меркаваць, што бюракратычным вінцікам лукашэнкаўскай сістэмы да лямачкі што прызнаваць экстрэмісцкім. Што сайт аматараў філатэліі, што выданне агароднікаў, што «Будзьма беларусамі». Бо калі б беларусацэнтрычны праект вылучылі ў штосьці асобнае, яго забаранілі б адным з першых. А так – толькі ў сярэдзіне 2023 году.
Быць беларусам як экстрэмісцкі ўчынак – гэта з сярэдзіны 1930-х гадоў.
У мяне пытанне: што рабіць з гэтымі выканаўцамі злачынных загадаў, якія ўсё жывое выводзяць па-за закон. Пытанне адкрытае для абмеркавання.
***
І да навінаў чыстага фашызму. Дыктатура ўзялася за самае што ні на ёсць інтымнае ў чалавеку – за наяўнасць ці адсутнасць у яго дзяцей. Цытую паводле выдання «Новы Час»: «Генпракуратура ўзялася за беларусаў, якія не хочуць заводзіць дзяцей. Спачатку прызнала «экстрэмісцкімі» паблікі чайлдфры ў сацсетках. А пазней у эфіры «НТВ-Беларусь» адна з начальнікаў ведамства заявіла, што гэтая плынь – праява нейкай «новай дэмакратыі» і частка інфармацыйнай атакі для прапаганды каштоўнасцяў, якія перашкаджаюць развіццю сямейных адносін. Чайлдфры яна назвала адной з пагроз для нацыянальнай бяспекі» (канец цытаты).
Удумайцеся, экстрэмізм цяпер – гэта канцэпцыя ненараджэння дзяцей. У чым падвох? У тым, што названая канцэпцыя супярэчыць словам Лукашэнкі пра пладзіцеся і множцеся. Гэта толькі спачатку можа падацца абсурдам. Дыктатарам патрэбная свежая кроў, якую можна замбаваць пад свае інтарэсы. А тут атрымліваецца сабатаж і падрыўная дзейнасць. Маўляў, мы не можам пакуль цябе скінуць з трону, але мы можам пазбавіць цябе і тваіх магчымых спадкаемцаў будучыні.
***
На мінулым тыдні пракуратура запатрабавала для Эдуарда Бабарыкі 10 гадоў зняволення. За актыўны ўдзел у 2020 годзе ў працы перадвыбарчага штабу Віктара Бабарыкі – бацькі Эдуарда.
Увесь мінулы тыдзень працягваліся катаванні беларускіх палітычных зняволеных.
Падтрымліваем сваіх у засценках.
Памятаем пра беларусаў на франтах ва Украіне.
Слава ЗСУ! Жыве Беларусь!
Севярын Квяткоўскі, Беларускае Радыё Рацыя
