Алег Трусаў: Беларуская мова – асноўны гарант нацыянальнай бяспекі
Трыццаць адзін год таму Беларусь, яшчэ як савецкая рэспубліка, зацвердзіла беларускую мову ў якасці адзінай дзяржаўнай. За пяць гадоў такога статусу, большасць школаў Беларусі ўжо былі беларускімі, і перспектыва была светлая.
Але ўстановы агульнасаюзнага роўню, сілавыя структуры – заставаліся расейскамоўнымі ў справаводстве, згадвае экс-дэпутат Верхоўнага савету Беларусі Алег Трусаў.
– Зараз павінны па-беларуску працаваць усе органы. Перш найперш міліцыя, КДБ, пажарнікі і войска. Пакуль наша войска не будзе працаваць на беларускай мове – гэта будзе войска чужой дзяржавы. І рускамоўнае войска не абароніць нас, калі, не дай Бог, на нас нападуць з усходу. Яно поўнасцю перабяжыць у той лагер, бо мова ў арміі – гэта аснова.
Беларуская мова застаецца адзіным і асноўным гарантам нацыянальнай бяспекі і незалежнасці. Гэта паказвае ўвесь гістарычны працэс, практыка суседства з імперскай Расеяй.
Кажа Алег Трусаў:
– Калі мы хочам захаваць незалежную дэмакратычную Рэспубліку Беларусь, у ёй павінна быць адна дзяржаўная мова – беларуская, а для іншых моў павінна быць асобнае заканадаўства. Хаця б такое, як напрыклад, у Казахстане. Нават у Казахстане, дзе казахаў толькі 52%, адна дзяржаўная мова.
На думку Алега Трусава, станоўчы вынік мінулага года, гэта трансфармацыя значнай часткі беларускай нацыі да стану ўсведамлення свайго месца ў свеце, дзе беларуская мова – каштоўнасць нацыі.
Якуб Сушынскі, Беларускае Радыё Рацыя
