Аляксандр Авяр’янаў: Я прывязаўся сэрцам да гэтай зямлі
Амбасадар Беларусі ў Польшчы Аляксандр Авяр’янаў паведаміў, што гэта апошні яго візіт у Беласток у якасці амбасадара. Пра гэта ён абвясціў на фестывалі „Беларуская песня”.
Словы падзякі ён адрасаваў гасцям фестывалю ды ўсім жыхарам Падляшша:
– За гады працы ў Польшчы я прывязаўся сэрцам да гэтай гасціннай зямлі і асабліва да людзей, якія жывуць і працуюць на Беласточчыне – да вас паважаныя сябры. Я шчыра захапляюся вашай адданасцю беларускім традыцыям, вашай любоўю да беларускай мовы і беларускай культурнай спадчыны. За гэта вам вялікі дзякуй і нізкі паклон. Дзякуй за тое сяброўства, якое я знайшоў сярод вас, за цеплыню пачуццяў, за адчуванне сябе, як на Радзіме. Гэтае вельмі каштоўнае пачуццё застанецца са мной назаўжды.
У сваю чаргу намеснік старшыні Галоўнага праўлення Беларускага грамадска-культурнага таварыства Васіль Сегень падзякаваў Аляксандру Авяр’янаву за гады плённай працы, у тым ліку на карысць беларусаў Польшчы.
Ганна Комінч, Беларускае Радыё Рацыя
