Аляксандр Дабравольскі: Расея не мае маральных абмежаванняў
„Чарговы візіт міністра абароны Расеі Сяргея Шайгу ў Беларусь, яго заява пра стварэнне авіяцыйнай базы ў Бабруйску ў 2015 годзе паказваюць, што Беларусь працягвае небяспечна ўцягвацца ў расейскую ваенную арбіту”, – лічыць сябра палітсавета Аб’яднанай грамадзянскай партыі Аляксандр Дабравольскі. Ён лічыць, што гэтую небяспеку разумеюць і беларускія ўлады:
– Тое, што адбылося ва Украіне, моцна напалохала Лукашэнку і ўсіх астатніх так званых сяброў па СНД, але Лукашэнка на жаль ужо так павязаны з Расеяй, што ў яго магчымасць манеўру вельмі малая. Гэта вельмі небяспечна для Беларусі, калі тут будуць расейскія войскі. Па-першае, расейскія войскі былі ў Крыме і пасля яны былі выкарыстаныя для таго, каб захапіць гэтую тэрыторыю. Тое, што Расея не мае ніякіх маральных абмежаванняў, каб захапляць чужое ўжо відавочна.
„Пагроза для беларускай незалежнасці павялічваецца”, – лічыць Аляксандр Дабравольскі. „Рост ваеннага супрацоўніцтва з Расеяй, тым больш стварэнне тут новых ваенных базаў як раз і нясе найбольшую небяспеку для Беларусі”, – лічыць палітык.
Беларускае Радыё Рацыя, Менск
