Янукевіч: Улады будуць рабіць стаўку на сілавы варыянт
Намеснік старшыні Партыі БНФ Аляксей Янукевіч днямі быў падтрыманы партыяй як патэнцыйны кандыдат для ўдзелу ў будучых прэзідэнцкіх выбарах.
Пра сваё стаўленне да гэтага кроку палітык распавядае у эфіры Беларускага Радыё Рацыя.
РР: Партыя вылучае Вас на будучыя прэзідэнцкія выбары. Для вас, мабыць, нечаканасцю гэта не стала, бо пра гэта было яшчэ на мінулым з’ездзе заяўлена. Але, тым не менш, наколькі для Вас гэта прынцыповае і цяжкае рашэнне.
Аляксей Янукевіч: Я разумею, канешне, што гэта такая няўдзячная справа ў цяперашніх умовах у Беларусі, тым больш, пры адсутнасці свабоды на выбарах, празрыстасці падліку галасоў, умоваў нармальнай дзейнасці для дэмакратычнай апазіцыі. Гэта не было просате рашэнне.
РР: Партыя зараз перажывае не лепшыя часы. Частку офісаў згубілі, праблемы з фінансаваннем.
Аляксей Янукевіч: Гэта тычыцца не толькі партыі БНФ. Я думаю, любая з дэмакратычных апазіцыйных партый сёння знаходзіцца ў складаным стане. Гэта праблемы з фінансаваннем, з арганізацыяй дзейнасці, бо прэсінг супраць актывістаў, супраць партыйных структур, які ўжо больш за 20 гадоў зазнае апазіцыя, не мінае бясследна. І мы разумеем, што давядзецца любому дэмакратычнаму кандыдату ўваходзіць у гэтую выбарчую кампанію без істотных фінансавых рэсурсаў, без значынх інфармацыйных рэсурсаў. Але з іншага боку, касцяк Партыі БНФ складаецца з людзей адданых, матываваных ідэямі незалежнасці, нацыянальнай свабоды, асабістай свабоды, нацыянальнага адраджэння. Таму маральна да такой працы мы гатовы.
РР: У апазіцыі працягваюцца кансультацыі наконт адзінага магчымага прэтэндэнта. Ці Ваша рашэнне ўдзельнічаць канчатковае? Ці будзеце прыслухоўвацца да дыскусій і памяняеце сваё рашэнне?
Аляксей Янукевіч: Мы самі актыўна ўдзельнічаем у гэтых дыскусіях. І ў вялікай ступені фармуем і парадак, і змест гэтых дыскусій і кансультацый. Я думаю, што мы мусім пастарацца да канца студзеня кансультацыі скончыць. У тым выпадку, калі яны не завяршацца дамовай, тады мы асобна пойдзем у гэтую кампанію.
РР: Якія шанцы на выбары 2020? Бо не ўсё так відавочна. Нават некаторыя кажуць, што Лукашэнка можа ў іх нават і не ўдзельнічаць, бо Крэмль занадта цісне.
Аляксей Янукевіч: Лукашэнка зараз мае дастаткова сіл, каб захаваць кантроль, і захаваць пасаду па выніках кампаніі 2020 года. Гэта разумее таксама і Крэмль. Я перакананы, што калі б была магчымасць у Пуціна тут паставіць іншага чалавека, ці дамагчысць таго, каб Лукашэнка сышоў, то Расея б гэта зрабіла абавязкова. Таму я бачу стратэгію Крамля як стратэгію на максімальнае аслабленне Лукашэнкі і Беларусі дзеля таго, каб паспрабаваць прывесці сітуацыю да такога стану, калі Аляксандару Лукашэнку можна будзе дыктаваць умовы і прымушаць яго пагаджацца на тую здачу суверэнітэту часткамі, якой вельмі хацелася б сёння Крамлю, альбо наогул паставіць нейкага прарасейскага і паслухмянага Крамлю кандыдата. Таму будуць інфармацыйныя ўкіды, інфармацыйныя атакі і асабіста на Лукашэнку, і ўвогуле на Беларусь, будзе эканамічны шантаж, перашкоды і для беларускага экспарту ў Расею. Не трэба выключаць любых правакацый. Бо мы ведаем, што Крэмль здольны на любыя правакацыі. Таму атмасфера на гэтых выбарах будзе напружаная. Я перакананы, што ўлады Беларусі будуць рабіць стаўку на сілавы варыянт. Таму ўмовы для дэмакратычных сіл, для апазіцыі будуць складаныя.
Цалкам гутарку слухайце ў далучаным файле:
Беларускае Радыё Рацыя, Менск
Фота euromaidanpress.com
