Амбасада РФ пацвердзіла затрыманне сваіх грамадзянаў
Аляксандр Лукашэнка сабраў нараду з чальцамі Савета Бяспекі. Пра гэта паведамляе афіцыйны сайт кіраўніка краіны. Нагода – затрыманне ў Беларусі больш трох дзясяткаў прадстаўнікоў замежнай прыватнай ваеннай кампаніі. У сваю чаргу, Twitter-акаўнт Амбасады РФ таксама паведаміў пра 32 затрыманых грамадзян Расеі.
Яшчэ днём раней Аляксандр Лукашэнка падчас сустрэчы з кіраўніцтвам і асабовым складам ведамстваў сістэмы забеспячэння нацыянальнай бяспекі закранаў тэму супрацьдзеяння «дэстабілізацыі ў Беларусі»:
– Больш за ўсё вас і мяне павінна турбаваць тое, каб мы ні ў якім разе не дапусцілі дэстабілізацыі абстаноўкі ў нашай краіне. Гэта наша з вамі найважнейшая і першасная задача. Пытанне выбараў прэзідэнта другаснае. Пытанне найважнейшае, першаснае – захаваць краіну.
Паводле інфармацыі дзяржаўных і недзяржаўных СМІ, у ноч з 28 на 29 ліпеня непадалёк ад сталіцы былі затрыманыя 32 чалавекі і яшчэ 1 на поўдні краіны. Таксама вядома, што затрыманых «баевікоў» адносяць да прыватнай ваеннай кампаніі «Вагнера». Паводле адкрытых крыніцаў, ПВК «Вагнера» – гэта неафіцыйнае ўзброенае фармаванне дзейнічала на тэрыторыі Украіны, а пазней і Сірыі падчас ваенных канфліктаў. Дакладныя мэты знаходжання затрыманых іншаземцаў на тэрыторыі Беларусі пакуль афіцыйна не агучаны, але некаторыя палітолагі ўжо агучваюць версіі далейшага развіцця падзей.
Тым часам адзін з кандыдатаў у Прэзідэнты Беларусі Сяргей Чэрачань паведаміў што 30 ліпеня ўсіх прэтэндэнтаў запрашаюць у ЦВК на 08:55. «Навошта? Даведаемся заўтра», – падсумоўвае ён.
Беларускае Радыё Рацыя
Фота: БелТА
Глядзіце таксама
