Анаіс Марын – новы спецдакладчык ААН па правах чалавека ў Беларусі
Францужанка Анаіс Марын прызначана на пасаду спецдакладчыка ААН па сітуацыі з правамі чалавека ў Беларусі. Пра гэта паведамляецца на сайце Рады ААН па правах чалавека.
Рашэнне пра прызначэнне спецдакладчыка ААН па сітуацыі з правамі чалавека ў Беларусі было прынятае 28 верасня ў Жэневе.
Разам з Анаіс Марын на пасаду спецдакладчыка ААН таксама прэтэндавалі яшчэ 7 чалавек: Штэйнар Гіл (Нарвегія), Сатвіндар Джас і Эндру Уілсан (абодва Вялікабрытанія), Валеры Мажы (Францыя), Петрэ Роман (Румынія), Даніэль Меконнен (Эрытрэя), Джон Джозэф Раян (Ірляндыя).
Напомнім, што зараз пасаду спецдакладчыка ААН па сітуацыі з правамі чалавека ў Беларусі займае венгр Міклаш Харасці. Ён будзе на ёй да канца кастрычніка.
Рада ААН па правах чалавека 5 ліпеня прыняла рэзалюцыю, у якой падоўжыла мандат спецдакладчыка па Беларусі яшчэ на год. МЗС Беларусі не прызнае і адпрэчвае гэты дакумент.
25 чэрвеня бягучага года на сесіі ў Жэневе Міклаш харасці прадставіў даклад па сітуацыі з правамі чалавека ў Беларусі. Сутнасць гэтага даклада палягае ў тым, што ў Беларусі па-ранейшаму захоўваецца „сітуацыя здушэння правоў і свабодаў грамадзян”.
Беларускае Радыё Рацыя
