Астраномы РАН выявілі тэктанічны рух Крыма да Расеі
Тэктанічны рух паўвострава Крым накіраваны да мацерыковай Расеі, заявіў кіраўнік інстытута прыкладной астраноміі РАН Аляксандр Іпатаў. Пра гэта паведамляе „Інтэрфакс”.
Рух з хуткасцю 2,9 міліметра ў год быў зафіксаваны з дапамогай комплексу тэлескопаў „Квазар-КВО”. Па словах Іпатава, „нягледзячы на тое, што гэтая заява падобна да жарту, гэта з’яўляецца вынікам сур’ёзнага даследавання.”
„На самой справе гэта не жарт, хоць вельмі падобна. Крым рухаецца прыблізна на паўночны ўсход”, – сказаў дырэктар інстытута.
Крым стаў часткай Расейскай Федэрацыі ў 2014 годзе, Іпатаў, удакладніў што навукоўцы РАН вызначалі тэктанічны рух паўвострава з гэтага моманту.
Комплекс „Квазар-КВО” складаецца з трох радыёастранамічных абсерваторый, якія аб’яднаныя ў глабальны радыётэлескоп з эфектыўным дыяметрам люстэрка больш 4000км. З дапамогай комплексу вырашаюцца астраметрычныя, геадэзічныя і астрафізічныя задачы.
