Беларусь адмовілася размяшчаць расейскую вайсковую базу
Адмова Беларусі размяшчаць расейскую вайсковую базу з’яўляецца „непрыемным эпізодам”, заявіў міністр замежных спраў Расеі Сяргей Лаўроў у інтэрв’ю газеце „Коммерсантъ”, кажучы пра сумесную знешнюю і абаронную палітыку ў рамках Саюзнай дзяржавы.
„Гэта сапраўды непрыемны эпізод. Але галоўнае не форма, а змест. А па змесце прэзідэнт Беларусі Аляксандр Лукашэнка неаднаразова казаў, у тым ліку адказваючы на пытанне пра базу, што Беларусь — саюзнік Расіі на ўсе 100% і што беларускія Узброеныя сілы трэба разглядаць як тыя, якія абараняюць нашы агульныя інтарэсы і нашу агульную тэрыторыю”, — адзначыў Лаўроў.
„Па знешняй палітыцы ў чыстым выглядзе ў нас ёсць праграма сумесных дзеянняў. Такога ў нас больш ні з кім няма. У гэтым дакуменце пунктуальна і педантычна распісаныя тыя сумесныя крокі, якія мы будзем рабіць”, — дадаў кіраўнік МЗС Расеі.
Лаўроў таксама закрануў пытанне саюзніцкіх адносін у частцы прызнання Абхазіі, Паўднёвай Асеціі, сітуацыі з Крымам.
„Мы таксама не на 100% падзяляем беларускія знешнепалітычныя ўстаноўкі. Гэта нічога не значыць… Што да прызнання Абхазіі, Паўднёвай Асеціі, сітуацыі з Крымам, мы нікога ні да чаго не прымушаем”, — адзначыў кіраўнік расейскага знешнепалітычнага ведамства.
„Мы па-іншаму выхаваныя. Я нават не магу сабе ўявіць сітуацыю, у якой мы так бы захацелі дзейнічаць. Наконт „можам” — гэта ўсё роўна спалучана з тым, што трэба пераступіць праз свае прынцыпы”, — дапоўніў Лаўроў.
„Калі нас спрабуюць абвінаваціць у чымсьці… Напрыклад, міністр замежных спраў Літвы Лінас Лінкявічус раптам заклапаціўся тым, як ідуць перамовы пра стварэнне Саюзнай дзяржавы. Нібыта далейшая інтэграцыя Масквы і Менска стварае пагрозу для Літвы, таму што яна будзе набліжаць Расею да літоўскіх межаў. Але, па-першае, мы і так маем агульную мяжу з Літвой… Але ён спецыфічны чалавек, даўно працуе. Не ўсім атрымліваецца захаваць вастрыню зроку і адчуванне рэальнасці”, — сказаў кіраўнік МЗС Расеі.
Лаўроў таксама падкрэсліў, што перамовы з Беларуссю, як неаднаразова падкрэслівалася, „ідуць у строгай адпаведнасці з тымі дамоўленасцямі, якія заключаныя ў Саюзнай дамове 1999 года”. „Больш ні пра што гаворка не ідзе. Там пазначаныя прыярытэтныя мэты, да якіх трэба рухацца. Урады абедзвюх краін напружана працуюць па даручэнні прэзідэнтаў. У снежні павінна адбыцца чарговая сустрэча ў вярхах. Усё, што мы зараз назіраем у эканамічных блоках нашых урадаў, кажа пра тое, што яны разумеюць неабходнасць дасягнуць дамоўленасцяў”, — запэўніў міністр замежных спраў Расіі.
На сустрэчы з амерыканскімі аналітыкамі 6 лістапада 2018 года Аляксандр Лукашэнка назваў „надуманай праблемай” развагі аб магчымым размяшчэнні на тэрыторыі Беларусі расейскай ваеннай базы ў адказ на дзеянні Вашынгтона. „Мы ў ваенна-палітычным саюзе з Расіяй. Будзе тут база ваенная, не будзе — розніцы абсалютна ніякай няма. І мы гэтую базу не размяшчаем тут не таму, што мы хочам вам ці каму-небудзь паказаць, што мы суверэнныя і незалежныя. Мы яе не размяшчаем таму, што яна тут не патрэбная. Мы самі па нашай задуме, ваеннаму абарончым плане з Расійскай Федэрацыяй, забяспечым тыя функцыі, якія на нас ускладзеныя”, — заявіў ён.
1 сакавіка гэтага года падчас „Вялікай размовы з прэзідэнтам” Лукашэнка расказаў, чаму Беларусь не стала прытрымлівацца прыкладу Расіі і прызнаваць незалежнасць Абхазіі і Паўднёвай Асеціі. Ён паведаміў аб папярэджанні былога генеральнага сакратара НАТА Хаўера Саланы, які сказаў яму, што ў выпадку прызнання гэтых рэспублік Менск чакаюць санкцыі: адключэнне банкаўскай сістэмы і поўная ізаляцыя.
Тады ж Аляксандр Лукашэнка заявіў, Беларусь не можа прызнаць Крым расійскім, таму што кіраўнік беларускай дзяржавы з’яўляецца адным з падпісантаў у 1995 годзе Будапешцкага мемарандума, які пацвярджае ў тым ліку забеспячэнне тэрытарыяльнай цэласнасці Украіны. Лукашэнка дадаў, што Расіі „можа спатрэбіцца ў гэтым канфлікце такая пазіцыя Беларусі”.
Фота ria.ru
