Беларусь-Расея. Які маркер стасункаў?
Адказваюць эксперты, спасылаючыся на расейскі сакрэтны дакумент.
Прыгадаем, што журналісты атрымалі доступ да ўнутранага дакументу пад назвай «Стратэгічныя мэты Расейскай Федэрацыі ў Беларусі», згодна з якім Расея збіраецца да 2030 году акупаваць Беларусь. Дакумент датуецца летам 2021 году і займае 17 старонак, дзе пералічваюцца палітычныя, абаронныя, гандлёвыя і сацыяльныя мэты расейскіх уладаў у Беларусі. А рэчаіснасць зараз яшчэ горшая чым гэты дакумент — кажа палітычны аналітык Аляксандр Фрыдман, які звяртае ўвагу на год дакументу, і кажа, што сітуацыя істотна змянілася.
– Паколькі пасля пачатку вайны безумоўна працэсы паскорыліся. Тут яшчэ раз трэба дадаць, што Пуцін сёння зусім адкрыта кажа пра тое, што гістарычныя тэрыторыі Расеі павінны знаходзіцца не толькі ў арбіце інтарэсаў Расеі, але павінны стаць часткай Расейскай Федэрацыі. Усім усё відавочна, што гаворка ідзе таксама і пра Беларусь. Так што дакумент адлюстроўвае тую палітыку і тыя мэты, якія мае Расейская Федэрацыя.
У фарватары таго, як развіваюцца падзеі – палітычны аналітык Паўлюк Быкоўскі гэты дакумент лічыць толькі інфармацыйнай нагодай. Але ўвагу звяртае на іншыя акалічнасці.
– Больш сур’ёзныя рэчы прапісаныя ў дамовах Саюзнай дзяржавы. Гэтыя накірункі па развіцці Саюзнай дзяржавы, дзе ўлагоджваюцца ці мадыфікуюцца пад маскоўскі капыл падаткавыя заканадаўствы і г.д. і г.д. То ўсё гэта пралічана і прапісана. І гэта рэальна рэалізуецца. А тое, што тут сказана пра ўвядзенне расейскага рубля, то ён быў прадугледжаны дамовай аб стварэнні Саюзнай дзяржавы. Але ні рубель, ні канстытуцыйны акт, ні агульны парламент так і не былі ўтвораны.
І як заўважае палітычны аналітык – рэалізацыі гэтых планаў Аляксандр Лукашэнка пакуль пазбягае. Ён імкнецца лавіраваць у супрацы з кіраўніком Расеі. Сітуацыю можа змяніць расейская вайна, якая альбо прыспешыць працэсы, альбо змусіць ад іх адмовіцца.
Беларускае Радыё Рацыя
