Беларусь верне доўг Расеі за газ у абмен на зніжэнне цаны
Расея адновіць ранейшыя аб’ёмы паставак нафты беларускаму боку, а Беларусь адменіць рашэнне пра павышэнне тарыфаў на транзіт гэтай вуглевадароднай сыравіны.
Адпаведная дамоўленасць дасягнута паміж бакамі, паведаміў журналістам віцэ-прэм’ер Уладзімір Сямашка:
«Мы адрэгулявалі ўсе бягучыя моманты. Вы ведаеце, што ў трэцім квартале заблакаваная палова пастаўкі нафты ў Беларусь. Мы павінны былі атрымаць 6 млн т, а цяпер рэальна атрымліваем толькі 3 млн т. Цяпер усё гэта аднаўляецца. Да 20 кастрычніка павінна аднавіцца пастаўка нафты ў поўным аб’ёме пад поўную загрузку нашых НПЗ», — заявіў віцэ-прэм’ер.
«Мы таксама зрабілі кампрамісныя крокі. Нядаўна былі некалькі павышаны тарыфы на транзіт нафты. Мы гэта вяртаем назад. Гэта значыць застануцца тыя тарыфы, якія дзейнічалі па стане на 1 кастрычніка», — паведаміў Уладзімір Сямашка.
Сёння Лукашэнку было паведамлена, што Беларусь і Расея ўрэгулявалі праблемнае пытанне ў сферы паставак энерганосьбітаў.
«Я ўчора пазнаёміўся з дакладам урада па нафтагазавых пытаннях з Расейскай Федэрацыяй. Я так разумею, што чарговыя баталіі скончаныя і нам удалося выйсці на падпісанне адпаведнага дакумента, праблемныя пытанні, прынамсі на ўчорашні дзень, былі ўзгоднены і зняты», — сказаў кіраўнік дзяржавы.
***
Нагадаем, у 2016 годзе паміж Беларуссю і Расеяй разгарэўся нафтагазавы канфлікт. У сувязі з сусветным падзеннем цэнаў на энерганосьбіты Менск лічыць справядлівай цану на газ, які пастаўляецца ў Беларусь, у памеры 73 даляраў за 1000 кубаметраў (цяпер цана для Беларусі складае 132 даляры за 1000 кубаметраў). У Расеі казалі пра тое, што пра зніжкі на газ для Беларусі «гаворкі не ідзе».
З газавым пытаннем, а таксама запазычанасцю ў памеры 300 млн даляраў увязана і скарачэнне паставак нафты ў Беларусь у другім паўгоддзі на 5,25 млн тонаў, што ўжо абышлося Беларусі ў 0,3%ВУП.
7 кастрычніка Лукашэнка паведаміў, што ў перамовах па газе з Расеяй «у нейкай ступені лёд крануўся».
