Беларусі прапанавалі старшынства ў некаторых важкіх міжнародных арганізацыях
Беларусі прапанавалі старшынства ў некаторых важкіх міжнародных арганізацыях. Аб гэтым у эфіры тэлеканала „Беларусь 1” заявіў міністр замежных спраў Беларусі Уладзімір Макей.
Уладзімір Макей сказаў, што ў 2017 годзе Беларусь старшынствавала ў Цэнтральна-Еўрапейскай ініцыятыве, і партнёры ацанілі яго як вельмі паспяховае.
„Нам прапанавалі падумаць аб старшынстве ў некаторых іншых, больш важкіх арганізацыях. Я пакуль яшчэ не хацеў бы гаварыць аб гэтым, але мы цяпер якраз думаем, узважваем усе за і супраць. Думаю, рашэнне будзе прынята на больш познім этапе”, – сказаў міністр.
На яго думку, успрыманне Беларусі і падыходы па развіцці супрацоўніцтва з ёю змяніліся на Захадзе ў станоўчы бок. На гэта паўплывала і пазіцыя кіраўніцтва краіны па шэрагу значных праблем.
„Правядзенне 26-й сесіі Парламенцкай асамблеі АБСЕ ў Беларусі, наша старшынства ў Цэнтральна-Еўрапейскай ініцыятыве, правядзенне тут юбілейнага саміту Арганізацыі Дагавора аб калектыўнай бяспецы – усё гэта сведчанне таго, што на Беларусь пачалі глядзець інакш у свеце, і гэта радуе. Гэта яшчэ толькі пачатак”, – перакананы дыпламат.
У цэлым, гаворачы аб прыярытэтах знешняй палітыкі краіны на 2018 год, Уладзімір Макей адзначыў, што Беларусь прадоўжыць развіваць узаемадзеянне з традыцыйнымі партнёрамі, важная ўвага будзе ўдзелена адносінам з Кітаем, ЕЗ і ЗША, краінамі Паўднёва-Усходняй Азіі, Лацінскай Амерыкі. Акрамя таго, дыпламаты маюць намер больш актыўна папрацаваць з некаторымі афрыканскімі дзяржавамі.
„Планаў шмат”, – рэзюмаваў міністр.
Фота mfa.gov.by
