Блогер NEXTA: Варта, каб гэты фільм проста не забылі

таму

Выдрукаваць Пракаментаваць (0) Падзяліцца

На мінулым тыдні, Сцяпан Святлоў, больш вядомы як блогер NEXTA выпусціў дакументальны фільм “Лукашэнка. Крымінальныя матэрыялы”. Больш за тыдзень стужка трымалася ў трэндах беларускага YouTube, набраўшы амаль 1,5 мільёна праглядаў. Цяпер блогер анансаваў сустрэчу падпісантаў на плошчы Свабоды ў Менску ў пятніцу 8-га лістапада а 18:00.

Блогер NEXTA: Калі казаць пра лічбы, дык гэта ўжо каля двух мільёнаў людзей ва ўсіх сацсетках – паўтара на ютубе і пяцьсот тысячаў у «Аднакласніках» і ў іншых. Гэта кожны чацвёрты дарослы беларус азнаёміўся з фільмам, паказваў бацькам, знаёмым, сябрам, бабулям, дзядулям, суседзям. І таксама шмат гісторыяў паказвалі чыноўнікам, міліцыянтам, сацыяльным працаўнікам. З гэтым фільмам азнаёмілася палова краіны.

РР: Ты клічаш людзей на Плошчу. Навошта? Чаму? І чаму менавіта так хутка пасля выхаду фільма?

Блогер NEXTA: Гэта не мая ініцыятыва. Гэта ініцыятыва людзей, якія мне пісалі ў каментарах, у асабістых паведамленнях, што варта штосьці зрабіць, каб гэты фільм проста не забыўся праз 10 дзён, як гэта было з любымі іншымі рэзананснымі відэа. Адна з такіх прапаноў – сустрэцца разам, каб абмеркаваць магчымыя варыянты, што рабіць далей, прапанаваць свае ідэі, ну і ўвогуле неяк згуртавацца, пазнаёміцца адзін з адным і сустрэцца ўсім разам у адным месцы.

РР: Ты кажаш пра каментары, а многія кажуць: ну слухай, ты сядзіш у Варшаве, а клічаш людзей на вуліцу ў Менску.

Блогер NEXTA: Што тычыцца таго, што я сяджу ў Варшаве. Тое, што я сяджу ў Варшаве, не азначае, што я ў бяспецы. Мне працягваюць прыходзіць розныя пагрозы, розныя паведамленні. І нягледзячы на ніякія пагрозы, ніякі пераслед уладаў… а я заўважыў, што з кожным пераследам мой адказ на гэта – толькі ўзмацняецца, колькасць падпісантаў расце. Гэты фільм таксама вымагаў вельмі шмат працы, высілкаў, энергіі. І я б не сказаў, што я проста сяджу ў крэсле і кагосьці кудысьці заклікаю. Гэта, па-першае, не заклік, гэта проста прапанова сустрэцца. Калі хтосьці хоча, калі ласка прыходзьце, пазнаёміцеся, гэта абсалютна легальна, дзякуючы таму, што зараз ідзе легальная перадвыбарчая кампанія.

РР: А як ты ацэньваеш уласна, што з’явіліся ўвогуле такія рэакцыі, што клічаш на нейкую акцыю?

Блогер NEXTA: Я думаю, улады спужаліся, спалохаліся, і выдалі метадычкі «тапіць» за тое, што, па-першае, ён польскі блогер, знаходзіцца па-за межамі Беларусі. Па-другое, сам заклікае, а сам не прыйдзе. Гэта скіравана на тых, хто ўвогуле не арыентуецца ў сітуацыі. Мае падпісанты гэта ўсё дакладна ведаюць, прапускаюць проста міма вушэй.

РР: А што можам чакаць уласна ў пятніцу 8 лістапада на плошчы Свабоды?

Блогер NEXTA: Гэта будзе проста сходка, як кажуць моладзевыя блогеры, ці сход падпісантаў каналу, абмеркаванне фільму. Хтосьці з вядомых блогераў выступіць перад людзьмі. Людзі пазнаёмяцца, з’явіцца банк ідэяў, куды яны змогуць свае ідэі даслаць. Сярод лепшых, я спадзяюся, атрымаецца разыграць прызы, бонусы. Я спадзяюся, гэта будзе яскрава, гэта будзе без аніякага гвалту, ці канфлікту і правакацыяў. Гэта будзе проста акцыя, як у нармальнай цывілізаванай краіне праходзяць сотні акцыяў блогераў і гэта не ёсць нейкай падзеяй маштабу ўсёй краіны.

РР: У сваім фільме ты кажаш, што ўжо чвэрць стагоддзя кіруе Лукашэнка ў Беларусі і ўвесь час гучаць такія галасы, калі хтосьці кліча на нейкія акцыі пратэсту, што яшчэ не час. А як мяркуеш, можа не час і цяпер?

Блогер NEXTA: Ёсць такія людзі, якія на працягу ўсіх 25-ці гадоў кажуць: не час. І хочацца ў іх запытацца: а калі будзе час? Калі працягваць нічога не рабіць і быць такой амёбай, то, вядома, нічога не зменіцца. Калі паспрабаваць хаця б штосьці зрабіць, хаця б згуртавацца разам, паглядзець адзін на аднаго, пазнаёміцца, гэта ўжо зусім іншая сітуацыя, і трэба пачынаць з чагосьці.

Цалкам гутарку слухайце ў далучаным файле:

Сам Сцяпан Святлоў кажа, што фізічна на сустрэчу не прыедзе, бо выдатна разумее, што ў Беларусі яму пагражае турма. “Разумеюць гэта і мае падпісанты”, – дадаў блогер.