БНФ: Нашы кандыдаты здольныя правесці моцныя выбарчыя кампаніі
Кандыдаты ад Партыі БНФ здольныя правесці моцныя выбарчыя кампаніі, „няхай іх і не шмат”, заявіў намеснік старшыні арганізацыі Аляксей Янукевіч.
Сёння ў Беларусі пачалося вылучэнне кандыдатаў у дэпутаты мясцовых саветаў, выбары якіх адбудуцца 18 лютага 2018 года.
„На сёння ў нас каля 50 кандыдатаў. Большасць з іх будзе вылучацца праз збор подпісаў. Некаторых прадубліруем партыйным вылучэннем„, — сказаў Янукевіч.
Палітык адзначыў, што гэта не вялікая лічба, „але калі гаварыць пра мясцовыя выбары, 50 або 150 чалавек — прынцыповай розніцы няма„. „Таму мы вырашылі, што ў асноўным у нас будуць кандыдаты, якія ўжо працуюць у сваіх акругах, якія здольныя зрабіць моцныя кампаніі. Не хочацца сітуацыі, каб вылучаць кандыдатаў дзеля іх колькасці, а затым ўлады выкарыстоўвалі яе для дыскрэдытацыі дэмакратычных сіл„, — сказаў Янукевіч.
„У нас стаўка робіцца на моцных кандыдатаў. Будзе вылучацца і моладзь, але гэта таксама моцныя асобы, якія маюць каманды і разумеюць, што робяць„, — падкрэсліў ён.
Вылучэнне кандыдатаў працягнецца па 8 студзеня 2018 года ўключна. Правам іх вылучэння надзелены палітычныя партыі, грамадскія арганізацыі, а таксама грамадзяне шляхам збору подпісаў.
Заканадаўствам устаноўлены некаторыя патрабаванні для кандыдатаў у дэпутаты мясцовых саветаў: грамадзянства Рэспублікі Беларусь (кандыдатамі таксама могуць быць вылучаны і грамадзяне Расійскай Федэрацыі, якія пастаянна пражываюць на тэрыторыі Беларусі), дасягненне ўзросту 18 гадоў, адсутнасць судзімасці.
Рэгістрацыя кандыдатаў у дэпутаты мясцовых саветаў дэпутатаў будзе праходзіць адпаведнай тэрытарыяльнай, акруговай камісіяй з 9 па 18 студзеня 2018 года ўключна. БелаПАН
