БСДП прапаноўвае скараціць колькасць МУС у 3-4 разы
Беларуская сацыял-дэмакратычная партыя (Грамада) прадставіла канцэпцыю рэформы органаў унутраных спраў, следства, пракуратуры і спецслужбаў.
Сярод прапаноў — скарачэнне колькасці, перавод шэрагу супрацоўнікаў у катэгорыю грамадзянскіх служачых, захаванне адной спецслужбы (Савет нацыянальнай бяспекі).
„Прапанова рэформы вельмі своечасовая: мы бачым, як сябе паводзіць сістэма ў крызіснай сітуацыі, і разумеем, што ў такім выглядзе яна не зможа існаваць у новай Беларусі”, — сказаў на прэс-канферэнцыі старшыня БСДП Ігар Барысаў.
Паводле яго слоў, у партыі рыхтуюць дакументы, якія могуць стаць асновай законапраектаў для новага парламента.
У сістэме органаў унутраных спраў зараз задзейнічана больш за 130 тыс. чалавек, гэта не толькі міліцыя, але і спецслужбы, папраўчыя ўстановы, адзначыў аўтар канцэпцыі, былы суддзя Канстытуцыйнага суда Міхаіл Пастухоў.
„Неабходна скараціць колькасць да еўрапейскага ўзроўню: 300 міліцыянераў на 100 тыс. насельніцтва, у нас цяпер — 1.440 з лішнім. Значыць, трэба скараціць у 3-4 разу. Таксама неабходна змяніць структуру, скасаваць шэраг ведамстваў, якія парушаюць Канстытуцыю”, — заявіў Пастухоў.
Дэпартамент выканання пакаранняў МУС ён прапанаваў перападпарадкаваць Міністэрству юстыцыі, а шэраг супрацоўнікаў міліцэйскага ведамства, у тым ліку следчых, вывесці ў катэгорыю грамадзянскіх служачых. Сярод іншых прапаноў: да мінімуму скараціць адміністрацыйныя арышты, абмежаваўшы максімальны тэрмін пяццю суткамі, разгрузіць турмы, правёўшы амністыю, стварыць больш гуманныя ўмовы ў месцах пазбаўлення волі.
„Сістэма не застанецца без працы і пасля змены ўлады. Але яна павінна быць дэмакратызаваная, праведзеная чыстка, і павінна быць рэформа заканадаўства”, — лічыць аўтар канцэпцыі рэформы.
У катэгорыю грамадзянскіх служачых могуць быць пераведзеныя таксама супрацоўнікі дэпартамента па грамадзянстве і міграцыі, дэпартамента аховы, сказаў Пастухоў, адказваючы на пытанне БелаПАН аб неабходнасці скараціць колькасць ваеннаслужачых у структуры МУС. „Скарачэннем ваеннаслужачых мы значна скароцім нагрузку на сацыяльныя органы і бюджэт”, — дадаў Ігар Барысаў.
„Ваенная форма засталася ад камуністычнага мінулага. Я пытаюся ў супрацоўнікаў МУС, чаму было нешта зроблена, мне адказваюць: „Мне загадалі”. Калі будзе грамадзянская асоба, гэты фармальны стрымальны фактар знікне. Цяпер афіцэраў палохаюць тым, што яны будуць прыцягнутыя да крымінальнай адказнасці за невыкананне загадаў”, — патлумачыў праваабаронца, намеснік старшыні БСДП Алег Волчак.
Акрамя таго, прапаноўваецца перайменаваць МУС у Міністэрства ўнутраных спраў і адміністрацыі, міліцыю — у паліцыю („міліцыяй называецца добраахвотнае нерэгулярнае аб’яднанне грамадзян (апалчэнне)”), кіраўніком ведамства пры гэтым павінен быць толькі грамадзянскі чалавек з вопытам работы на адміністрацыйных пасадах, кандыдаты на службу павінны валодаць беларускай мовай, над МУС павінен быць усталяваны парламенцкі кантроль.
У рэформе спецслужбаў прадугледжана, што замест КДБ і шэрагу іншых спецслужбаў будзе створана Служба нацыянальнай бяспекі. Пры гэтым СНБ не павінна будзе займацца барацьбой з карупцыяй, кантрабандай, незаконнай міграцыяй, незаконным абаротам наркотыкаў. Асноўнымі напрамкамі яе дзейнасці будуць разведка, контрразведка, барацьба з тэрарызмам, ахова вышэйшых чыноўнікаў і дзяржсакрэтаў.
Глядзіце таксама
